Kurdîstan û Tirkîya de Komloyê 15ê Sibate ame şermezarkerdene û azadîya Ocalanî ameye waştene. Çalakîyan de xoverdayîşê zîndanan zî ame selamkerdene û ame vengdayene ke wa waştişê tepişteyan bêrê caardene.
Xeylêk merkezana Kurdîstan û Tirkîya de Komployê Mîyanneteweyî yê vara Rayberê Şarê Kurdî Abdullah Ocalanî ame şermezarkerdene.
Wan de hetê Rêxistina HDPyî ra aşkerayîyêke ameye dayene. Çalakîya ke xeylêk kesî tewrê ci bîyî de wekîle Muazzeze Orhan komplo sey mudaxaleyê vera Rojhilatê Mîyanênî name kerd û vat: ''Pê hêrişê vera kurdan komplo yeno aktuelkerdene.'' Orhane bale ante grevê vêşanîye yê zîndanan ser û vat: ''Vengo ke zîndanan ra beno berz vera neheqîye û bêedaletîye yo. Birêz Ocalanî 22 serrî yo xoverdayîşo pîl dano. Têkoşîno ke vera tecrîdî yeno dayene do welatî zî tengayî ra bixelisno. Ma zî do na çarçewe de têkoşînî pîlêr bikerê.''
Bazîdê Agirî de zî bi eşkerayîyêke tecrîd ame protestokerdene. Hemserekê HDPyî yê qeza Abdullah Ekelîkî ard ziwan ke tecrîd Îmraliyî ra heme welatî ra vila bîyo.
Reyna rêxistinanê HDPyî yê Adana û Mersinî zî pê eşkerayîyan komplo şermezar kerd, xoverdayîşê zîndana selam ker û waşt ke tecrîdê serê Abdullah Ocalanî bêro wedaritene.
