KON-MEDî hêrişê Nurnbergî şermezar kerd û waşt Tahîr Koçer û kurdê ke ameyê destbendkerdnee wa vera bidîyê. KON-MEDî venga hukmatê Almanya da ke wa hemkarîya xo ya bi dewleta tirke ra fek vera bido.
Hemserekanê KON-MEDî derheqê sereştişê vera Merkezê Komelê Demokratîkî yê Kurdan (NCDK) ê Nurnbergî de eşkerayîyêke daye.
Eşkerayîye de ame vatene ke nê hêrişê polîsan nênê qebulkerdene. KON-MEDî vat: ''Ma do têkoşînê xo yê heqdarî her ca de vera nê hêrişan bikerê. Ma do deşîfrekerdişê polîtîkayanê şerê gemarinî yê dewleta Almanya rê dewam bikerê. Polîsanê almanan 22yê kanûne de serê sibayî eşt NCDKê Nurnbergî ser û keyeyanê kurdîstanijan ser. Nê sereştişan de embazê ma Tahîr Koçer ame destbendkerdene. Ma nê kerdişan qebul nêkenê û şermezar kenê.
Almanya bi nê kerdişan şarê kurdî krîmînalîze kena. Hêrişê dewleta tirke yê vera şarê kurdî, sîyasetmedaranê HDPyî dewam kenê. No heman tewirê Almanya yê vera kurdan nêno qebulkerdene. Qet yew teda do nêeşka têkoşînê azadî û demokrasî yê şarê kurdî vindarna. Ma vengê hukmatê Almanya danê ke nê polîtîkayan ra, hemkarîya bi dewleta tirke ra fek vera bido. Ma sey KON-MEDî hêvî kenê ke hukmatê Almanya pêro kesayetanê sîyasîyan bi taybetî embaz Tahîr Koçer vera bido.
Vera na rewşa faşîste û antî-demokratîke ma venga pêro rayaumûmîya Almanya û kurdîstanijan danê ke wa bêrê Merkezanê Komelê Demokratîkî yê Kurdan. Bêrê ma pîya nê polîtîkayanê krîmînalîzkerdişî vindarnê!''
