Kongreya Demokratîke ya Şaran (HDK) bi şîarê ''Bi hêvî, bi xoverdayîşî, pîya ver bi azadîye'' Konferansê Pêroyî yê 13inî kena. Hemserekê DEM Partî Tulaye Hatîmogullari û Tuncer Bakirhan, Hemserekê DBPyî Keskîn Bayindir û temsîlkarê xeylê partî û rêxistinan tewrê konferansî bîyî.

Konferans de hêverî Hemvervatoxê HDKyî Cengîz Çîçekî qisey kerd. Çîçekî bale ante ser ke ê dewrêkê neweyî de yê û HDK seba şaran warê çareserîyan o alternatîf o. Çîçekî bale ante tecrîdê vera Rayber Apoyî ser û îfade kerd ke bi têkoşînê şaran ê yewbîyayeyî ê do azadîya Rayber Apoyî bîyarê ca.

Hemvervatoxa HDKyî Esengule Demîr qiseykerdişê xo de venga şaran da ke bi ruhê Kobanê têkoşîn û xoverdayîşî binê sîwana HDKyî de yew bikerê.

Dima Hemserekê DEM Partî Tuncer Bakirhanî qisey kerd û wina xîtabê girseyî kerd: ''HDK ewro sîwana têkoşînê şaran a.Ma pê bawer ê ke HDK xo naye ra pey hol rêxistin bikero. Rojhelatê Mîyanênî de şerê giranî est ê. Seba ke ma nê kaosî ra tesîr nêbê ganî çareserîya meseleya kurdan bêra caardene. Seba çareserîye zî ganî tecrîd bêro wedaritene û Birêz Ocalan qisey bikero. Ganî fikrê Ocalanî biresê şaranê Tirkîya, kedkar, hemra û embazan. Seba ke têkoşînî ra netîceya pozîtîfe bêra girewtene zemîn û îmkanî est ê. Îqtîdaro ke qalê çareserîye keno qeyûm tayînê Şaredarîya Esenyurtî kerdo. Seba çareserîye ganî îqtîdar nê zulmî ra fek vera bido.''

Hemserekê DBPyî zî konferans de nê çîyî ardî ziwan: ''HDKyî tim vera îqtîdarî û yewperestîye têkoşîn kerd. Fikranê Birêz Ocalanî tim wina rayîr mojna têkoşînê şaran. Şaran binê sîwana HDKyî de xo vera yewperestîye rêxistin kerd. Nê têkoşînî game bi game îqtîdar qels kerd. Eke azadîgîrî bêrê yewca şarê Tirkîya do azad bibê. Ewro fikrê Birêz Ocalanî dinya ra vila benê. Fikrê ey eşkenê meseleyanê Rojhelatê Mîyanênî û welatî çareser bikerê.''