Parlamentoyê Ewropa de derheqê rewşa tepişteyanê sîyasîyan de ê ke raştê tecrîd, îşkence û muameleyê xirabî yenê, konferansêk ame kerdene. Konferanso ke endamê Parlamentoyê Ewropa Massimiliano Smeriglio mêmandarîya ci kerd hetê Yewîya Avûkatan ê Ewropa yê Semedê Heqanê Merdiman ê Dinya (ELDH), Avûkatê Demokratî yê Ewropayijî  (AED) û Komeleya Demokrasî û Huqûqê Mîyanneteweyî (MAF-DAD) ra ame organîzekerdene.

Konferanso ke bi sernameyê ''Tepişteyê sîyasîyî: Tecrîd, muameleyo xirab û îşkence'' ame organîzekerdene de xeylêk roniştişî ameyî kerdene.

Pîspora huqûqê ceza û huqûqê heqanê merdiman û endama Akademisyenan ê seba Haştîye Dr. Gulşah Kurt  qiseykerdişê akerdişî de vat: ''Zîndananê Tirkîya de bitaybetî zî Îmrali de heqê merdiman ê huqûqî yenê binpaykerdene. Heqê hêvî zî semedê Rayberê Şarê Kurdî Abdullah Ocalanî nîno caardene û bi keyfî cezayê dîsîplînî yenê dayene û pêvînayîşê avûkat û merdimanê înan yenê astengkerdene.''

Panelê verênî de nimûneyê Ewropa gerîyayî dest. Derheqê rewşa şertanê zîndanan ê Macarîstan û herêma Baskî ya Îspanya de ame qiseykerdene.

Panelê diyînî de binê sernameyê ''Tirkîya û Zîndanê Îmraliyî'' de ame kerdene. Hemserekê Komeleya Avûkatanê Sosyalîstan a Haldane Deepa Drivero ke moderatorîya panelî kerd da zanayene ke Tirkîya de hûmara tepişteyan 5 kat zêdîyaye û vat, ''Ganî ma Îmrali sey laborauvarêkî bîgêro dest.''

Temsîlkara Heyetê Îmraliyî Avûkat Lena Charlotta Lagnander zî bale ante ser ke vera kurdan zextê zafhetinî yenê kerdene û vat, ''Nimûneya  tecrîdê winayênî dinya de çîn a. Tecrîd semedê her kesî îşkence yo. Ganî ma pêro pîya şirê CPTyî ser ke raporê xo eşkera bikero. Ganî welatê Ewropa zî şirê Tirkîya ser. Tirkîya na bêvengîye ra paştî gena. Ganî tecrîd bêro qedînayene. Tecrîd wa heme welatan de bêro wedaritene. Şarê kurdî bi têkoşînê xo semedê ma nimûne yo.''

Buroyê Huqûqî yê Asrinî ra Mazlûm Dînçî zî nê vatî: ''Heme heqê tepişteyanê sîyasîyan yenê bipaykerdene. Nêweşî nînê tedawîkerdene. Tepişteyê sîyasîyî mecburê ke hewcedarîyanê xo yê bingêyînan bi xo bihernê. Seba ke tepişteyê ke rewşa înan a ekonomîkî hole nîya teberî ra înan rê pere yeno, no zî sey sûcî yeno hesibnayene. Tepişteyî bi sebebanê keyfîyan nînê tehlîyekerdnee.

Seba ke huqûqê zerî ra hêvîya ma çîn a ma rewşê kirişte warê mîyanneteweyîyî. Mehkemeya Heqanê Merdiman a Ewropa qebul kerd ke Tirkîya de huqûq yeno binpaykerdene la semedê wediritişê bêhuqûqîye nêşina Tirkîya. Dezgehê mîyanneteweyîyî derehqê Abdullah Oclaan û tepişteyanê sîyasîyan ê kurdan de zaf kewnê erey û gama ke qerar genê zî peyê qerarê xo de nêvindenê. Ganî vera tecrîdê Îmraliyî têkoşîno aktîf bêro kerdene. Na têna meseleya kurdan nîya. Ganî torra mîyanneteweyîye bêro ronayene ke tecrîd bêro şiknayene.''