Dîwanê Hemserekîye yê KONGRA-GELî bi eşkerayîyêke venga pêro kurdîstanijan da ke 12ê teşrîna peyêne de tewrê rayraşîyayîşê Dusseldorfî bibê.

Eşkerayîye de ame vatene ke rixmê belge û dîmenan dezgehê sey OPCW û Neteweyê Yewbîyayeyî (NY) vera hêrişanê kîmyewîyan bêveng ê û dewleta tirke zî ney rê paştî gêna. KONGRA-GELî îfade kerd ke sere de OPCW dezgehê Ewropa bi nê hawayî benê hemkarê sûcanê dewleta tirke.

KONGRA-GELî vist vîrî ke dezgehanê kurdan ê teberê welatî 12ê teşrîna peyêne sey 'Roja Grevê Neteweyî yê Vera Hêrişanê Kîmyewîyan' îlan kerdo û ganî a roje kurdîstanijî nêşorê kargeh û dibistanan.

KONGRA-GELî vat: ''Ma venga şarê xo û dostanê xo danê ke 12ê teşrîna peyêne de Dusseldorf de bi beşdarîyêka xurte û heybetînî bibê yew û bêvengîya vera hêrişanê kîmyewîyan bişiknê. Seba wayîrvejîyayîşê gerîlayan, ma bibê vengê înan. Ma Erdoganê faşîstî û kesanê bêvengan protesto bikerê.''