Rêxistina HDPyî ya Dîlokî konraya xo ya çarine bi tewrbîyayîşê hezaran kesan kerd. Hemsereka Pêroyî ya HDPyî Pervîne Buldan, Hemserekê Pêroyî yê KCDyî Berdan Ozturk, Dayîkê Haştîye û bi hezaran kesî tewrê kongre bîyî.

Badê bewlîkerdişê dîwanî kongre bi rêzgirewtişî dest pêkerde. Verî Berdan Ozturkî qisey kerd. Ozturkî bale ante şerê Ukrayna-Rusya ser û vat: ''Şerê dinya yê hîrêyînî xorî beno. Ma zanê no şer çira vejîya. No şer şerê ez dahîna jîhata yo.''  Ozturkî şer û îşxalê dewleta tirke vîstî vîrî û vat: ''Nika zî bîyî gogerçîna haştîye. Efrîn û Girê Sipî îşxal bikerê û dima ra zî wina vajê.  Wekîlîya Semra Guzele bidê war û dima ra wajê haştîye. Çew şima ra bawer nêkeno.  Şima nêeşkenê bi nê zîhnîyetî dewam bikerê. Şar do cewabê vatiş û kerdişanê şima bido.  Yew meseleya kurdan esta. Na mesele meseleya azadîye ya. Kurdî wazenê erdê xo de azad biciwîyê. Azadîye û demokrasî senî yenê. Ma heta nefesê xo yê peyênî tim vanê, rayîrê nê Îmrali yo. Pêvînayîşê Rayber Apoyî yo. NATO şima rê çare nêbeno. Şima bi dişmenîya vera kurdan pîya bi NATO û Amerîka Mexmûr û Şingalî danê bombayayn ver, Başurê Kurdîstanî îşxal kenê. Efrînî îşxal kenê. Rojêke do çeteyê şima Efrînî ra vejîyê û haştîye bêro na herre.''

Pervîne Buldan zî bale ante hêrişanê vera HDPyî ser û vat: ''Ê ser nêkewtî û do ser nêkewç. Nêeşkayî ma sîyasetî ra biqerfine, do meşekê. Înan vat qey ma mehkemeyanê înan rê milê xo çewt kenê la ma planê înan betal kerdî. Cayo ke têkoşînê HDPyî dest pêkeno cayê qedînayîşê sîyasetê AKPyî yo. Ewro na kongre de zî ame vînayene ke partîya ma senî payra ya. Înan waşt ke HDPyî Dîlokî ra biesterê la nêeşkayê ser bikewê. Ê do sîyasetî zî caverdê, Dîlokî zî. HDP nêkewt aksê ci de bi hêvîya şaran. La zîhnîyeto tarî do pêsîrê şarî ra miheqeq bikewo. AKP do bikewo, MHP do bikewo. Ma Sûrîye de, Ukrayna de, Tirkîya û dinya de haştîye wazenê. Ma sey HDPyî vera heme şeran vejîyenê û vanê ke problemî wa bi dîyalog û mezakereyan bêrê çareserkerdene. Îqtîdar dişmenîye kurdan û cinîyan keno û semedê Ukrayna vengdayîşê haştîye keno. Yew manaya nê çîn a. Verî meseleyanê xo hal bikerê.''

Badê qiseykerdişan Aytene Kaya û Avnî Bilici sey hemserekanê HDPyî yê Dîlokî ameyî vîjnayene.