Konseya Ewropa de semedê wedaritişê tecrîdê Îmraliyî roniştişê ame kerdene.Wezîrê Edaletî û Karanê Zereyî yê Îzlanda yo verên Ogmundur Jonasson, Wekîla HDPyî ya Riha ya verêne Dîleke Ocalan û Avûkatê Rayberê Şarê Kurdî Abdullah Ocalanî Remzîye Ozturk sey qiseykerdoxan tewrê roniştişî bîyî.

Jonassonî ard ziwan ke sîstemê Îmraliyî qanûnanê Yewîya Ewropa binpay keno û vat: ''Azadîya Abdullah Ocalanî û haştîya Kurdîstanî pabesteyê yewbînan ê. Hela ke berê Îmraliyî akedebî game rindî ameyêne eştene. Mesajê Abdullah Ocalanî yê Newroza 2013yî  hêvî da şaran. Dima ra berî ameyî qefilnayene. Badê qedîyayîşê muzakerayanê Îmraliyî dewleta tirke verê xo da bajaranê kurdan û ser û bin kerdî. Kurdîstan de sûcê şerî yenê kerdene. Ma vanê ma rê hetkarî bikerê ke wa berê Îmraliyî bêrê akerdene û haştîya mendîye bêro Tirkîya.''

Razîye Oztuk zî bale ante ser ke dewleta tirke pêkerdişanê mîyanneteweyî binpay kena û vat: ''23 serrî yo Îmrali de tecrîdo giran est o. Rixmê raporanê Mehkemeya Heqanê Merdiman ê Ewropa û CPTyî vera tecrîdî gamêke nêameye eştene. Abdullah Ocalan û muwekîlê ma yê bînê ke Îmrali de yê nêeşeknê pêvînayîşê avûkatan û merdimanê xo bikerê. Abdullah Ocalanî tewr peynî 25ê adara 2021î de telefon de keyeyê xo dir qisey kerd û a roje ra nata tira xebere nînan girewtene. Cezayê dîsîplînî ke dîyêne muwekîlanê ma, ma ra mîyan yenê tepiştene. Ganî Konseya Ewropa heme parlamenterî şirê Tirkîya ser ke goreyê qanûnî têbigêro.''

Dîleke Ocalan zî vat: ''Ma hinda wazenê ke wa Abdullah Ocalan azad bo. Şarê kurdî û rayberê ci terorîst nîyê. Terorîst êyê ke nê şarî  rê îşkence kenê, erzenê zîndanan û mirnenê.  Bêvengîya welatanê Ewropa yê vera Tirkîya hemkarîya sûcî ya.''

Badê roniştişî yew dosyaya ke hetê Înîsîyatîfê Abdullah Ocalanî rê Azadîye ra derheqê tecrîdê Îmraliyî de ameye amadekerdene teslîmê parlamenteranê Konseya Ewropa bîye.