Goreyê xebera Ajansê Mezopotamya (MA) dewa Çariklikoyî ya qezaya Meramî ya Konya de keyeyo amedijo ke 20 serrî yo tîya ronişeno raştê hêrişê nîjadperestî ame.

Tewr tay 60 kesanê hêrişê keyeyî kerd. Netîceya hêrişî de Hamkîm Dal ( 43) ame qetilkerdene. Hêrişkarê ke Karahuyuk de ciwîyenê verî zî no keye tehdît kerdbi.

Birayê Hakîm Dalî yo ke ame qetilkerdene Hamdî Dalî ard ziwan ke seba ke ê kurdê raştê hêrişî ameyî. Dalî vat: ''Seba ke ma kurdê ma nêwazenê. Ma rê vatêne şima ganî tîya malê xo biroşê û şirê.  Şarê dewanê dormeyî zî tim marê zext kerdêne. Waştêne ke ma tîya ra şirê. Verî zî ge-ge tehdît kerdî.  Seatanê şewe de erazîya vengê ya dewe ma de gama ke şiwanan heywanî çêrnayêne pêrodayîş vejîya. Badê pêrodayîşî Karahuyukî ra tewr tay 60 kesî pîya bi çekanê xo ameyî.  Verî dezayê mi ser o guleyî varnayî. Ma hîrê kesî bî û înan pêrodayîşê şiwanan sey baheneyî şuxulna û seba ke ma kurdê hêrişê ma kerd. Birayê mi hêriş de dinyaya xo bedilnaye.''

Şahîdanê hêrişî ra Mehmet Emînî zî ard ziwan ke no hêrişo verêne ê vera keyeyî nêyo û vat: ''Ê pê heywankarîye îdareyê xo kenê. Xeylêk wexto na dewe de ciwîyenê.  Verî zî xeylêk rey vera nê keyeyî hêriş ame kerdene. Muxtarî tim dewijî pit kerdêne û verdayênî keyeyî. Têna muxtar ame destbendkerdene.''

12ê temmuze de taxa Baxçeşehîrî ya qezaya Meramî ya Konya de vera kurdan amebi kerdene û 4ê înan cinîyî 7 kesî bi giranîye birîndar bîyîbî.