9ê çeleyê 2013î de paytextê Fransa Paris de 3 cinîyê şorişgêrî yê kurdî onayoxa PKKyî Sakîne Cansiz, Temsîlkara KNKyî ya Parisî Fîdane Dogan û Endama Têgêrayîşê Ciwanan ê Kurdan Leyla Şaylemez ameybî qetilkerdene.

ANF zaf reyan Qirkerdişê Parisî de rolê Îsmaîl Hakki Musayî ser o vindertbi. Eşkera bibi ke sûîkast Paris de hetê dîplomatêkê tirkî yê payeberzî ra amebi serûberkerdene. Belçîka de derheqê ney de tehqîqatêk hema zî mîyanî ra yeno kerdene.

Îsmaîl Hakki Musa sersefirîya Parisî ra verî MÎTî de 'merdimo diyîn' bi. Qirkerdişê Parisî ra verî Musa sersefîrê Brukselî bi. Sersefîrîya ci ya Parisî de 17ê kanûna 2016î de Omer Guney zîndan de merdbi û dewa bi hawayêkê fîîlî qefilîyaye.

Belçîka de xîretê sûîkastî

Hezîrana 2017î de polîsanê Belçîka 3 kesê şikdarî agahîyanê rêxistinanê kurdan ser o vindarnayî. Nê serebûtî ra dima dokumentê neweyî tewrê dosyaya Qirkerdişê Parisî ameyî kerdene. Çunke nê 3 kesan vera Hemserekê KONGRA GELî Remzî Kartalî planê sûîqastî kerdêne. Şikdaran ra yew leşkero verên ê tirk Zekerîya Çelîkbîlek bi. Oyo bîn zî tede nasnameyê polîsan estbi Yakup Koç. Keso hîrêyîn zî Haci Akkulak bi ke aslê xo de kurd bi. Nê kesan verî Paris de 4 kesanê bînan reyde pêvînayîşî kerdo. Goreyê çimeyanê kurdan polîsê Fransa wina fikirîyenê ke Paris de dîplomatêkî no planê hêrişî kerdo.Belçîka derheqê nê kesan de tehqîqatêk kena û tehqîqat nimite yo. Agahîyê dosya eşkera kenê ke no keso dîplomatîk Musa yo.

Rojnameyê Fransa Journal de Dimanche da zanayene ke dokumentêkê Belçîka de rolê Musayî ame îsbatkerdene. Goreyê rojname nê dokumentî şikê 'îstîxbaratê tirkî tewrê Qirkerdişê Parisî bi' kerd hêzêr.

Hedefê sûîkastê Belçîka Remzî Kartal û Zubeyîr Aydar bîyî.

Rojnameyê Fransa Journal de Dimanche pare kerd ke nameyê Musayî dokumentanê nimiteyan ê dosyaya tehqîqatî de xeylêk reyî vîyareno û beno ke ey çalakîyê Ewropa serûber kerdê. Rojnameyî da zaneyene ke 3 kesanê ke Belçîka de tepişîyayê, Musayî reyde Qirkerdişê Parisî zî organîze kerd.

Comte: Mesuldarê bêcezaverdayîşê MÎTî selahîyetdarê sîyasî yê

Avûkatê keyeyanê Sakîne Cansiz, Leyla Şaylemez û Fîdane Dogan Journal de Dimanche rê qisey kerd û vat: ''Na sûcdarîye ra dima ganî Fransa venfa sesefirîya Tirkîya bidîyêne û heta o bierşawitêne welatê ci. Tewirê Fransa tersê ci eşkera keno.''

Journal de Dimanche hemen xebera xo de ca da  îtîrafanê endamanê MÎTî û îtîrafê sûîkastî yê Îsmaîl Hakki Pekînî. 

Serekê verênî yê Dayîreyê Îstîxbaratî yê Fermandarîya Pêroyî Îsmaîl Hakki Pekînî kanalê CNN Turkî de 16ê sibate de bernameyêk de pare kerd ke ganî vera îdarekaranê KCKyî hêriş bêro kerdene. Pekînî nê bernameyî de Qirkerdişê Parisî îtîraf kerdbi û vatbi: ''Ewropa de zî îdarekarê înan estê. Ganî ma çîyêk bîyarê Ewropa ser. Yanî verî Paris de amebi kerdene, heya.''

Avûkate Comte vat: ''Her kes nê qirkerdişî de rolê îstîxbaratê Tirkîya zaneno. La îqtîdarê Fransa bêveng o. No nêno qebulkerdene. Ma dî ke nê merdimî pêro Ewropa de aktîf ê. Mesuldarê bêcezaverdayîşê MÎTî selahîyetdarê sîyasî yê.''

Pawîyeno ke wezîfeyê Musayî sersefîrê Tunusî Alî Onaner bigêro xo ser. Onaner wextê Qirkerdişê Parisî de şewirmendo verên ê sersefîrîye bi.