Yilmaz Guneyo ke sînemaya Tirkîya de bi laqabê 'Qralo Xirabin' şinasîyeno, tewr peyêne Festîvala Fîlman a Cannesî de qisey kerdbi û wina vatbi: ''...Yar û neyarî ganî bizanê ke ma do ser bikewê, teqez ma do ser bikewê...Biciwîyo Kurdîstano xoser, yew û demokratîk...''

Yilmaz Guneyî 9ê êlula 1984î de nêweşîya kanserî ra Paris de dinyaya xo bedilnaye.

Embazê Yilmaz Guneyî seba ke  bawerî û hîşmendîya ey bidê ciwîyayene kovara hîrê mengan a bi nameyê 'Guney'î vejenê. Kovara Guneyî wexto ke hema weşbi hetê Yilmaz Guneyî ra ameyêne vetene, mergê ci ra dima zî Almanya de weşanayîşê ci dewam kerd. Kovare serra 1997î de Tirkîya de dest pê weşane kerd.

Ma serrgêra 36. ya mergê Yilmaz Guneyî de derheqê hunerê ey de xebatkarê kovare Çetîn Desdeyî reyde qisey kerd.

Desdeyî vat: ''Yilmaz Guney hem hunermend û dîrektor hem zî kesayeto polîtîk bi. Hunerê xo de tim fikrê xo yê polîtîkî eşkera kerdêne. Tim xîret yeno kerdene ke hetê hunerî yê Guneyî vejîyo vernî la hetê ci yo polîtîk zî pey de vera dîyeno. Kovara Guneyî mojnena ke nê wird hetê Guneyî yew ê. Ma serra 2014î de derheqê Yilmaz Guneyî de fîlmêko dokumenter girewt. Wexto ke Yilmaz Guney Zîndanê Selimîye de mendêne fikrê ci yê polîtîkî virazîyenê. Eke Yilmaz Guney biciwîyayêne fikrê xo yê şorişgêrî dewam kerdêne.

Derheqê Guneyî de dewa estbî coka Tirkîya ra vejîyo. Binê pêro şert û mercanê surgunî de zî hunerê xo dewam kerd. Eke biwaştêne eşkîyayêne sîstem de pêbikero û xo rê cayêk bigêro. La ey seba şarî hunerê şarî weçîna. Goreyê ê çaxî Guney derheqê meseleya kurdan de wayîrê fikranê averan bi. Vatêne Kurdîstan de kolonyalîzm esto û heqê kurdan esto ke çarenusê xo eşkera bikerê.''