Çarçewaya Hemleya Azadîye de vizêr London de kurdîstanijan û dostanê înan verê banê BBCyî de mîtîng û rayraşîyayîş kerd.

Bajaranê Edinburgh û Glasgowî ê Îskoçya ra û bajaranê Liverpool, Brighton, Sheffield ve Manchesterî yê Îngîlîstanî ra xeylê  kurdî û dostê înan bi otobosan û wesayîtanê taybetan verê xo da bînaya BBCyî. Pîya kurdan û dostanê înan xeylê grûbê enternasyonalî zî tewrê çalakîye bîyî.

Çalakîye de postero gird ê Rayber Apoyî ame akerdene û sloganê sey “Bijî Serok Apo”,“Bê Serok jiyan nabe”, “Bijî berxwedana gerîla”, “Jin jiyan azadî” ameyî vatene. Girse bi çepik, tîlîlîyan yew fekî ra bi vatişê ''Ocalanî'' qîra. Çalakwanan derheqê felsefeya Rayber Apoyî de bi hezaran vilawekî vila kerdî.

Mîtîng bi rêzgirewtişî dest pêkerd.Hemserekê Meclîsê Şarê Kurdî yê Londonî Îshak Milanî qiseykerdişê xo de bale ante muhîmîya mesejê Rayber Apoyî ser û vat ma hezar selaman şawenê Îmraliyî. Girseyî zî yew fekî ra Îmralayî rê selamî şawitî.

Bi nameyê hemleya Abdullah Ocalanî rê Azadîye ya Britanya Temsîlkarê Karanê Teberî yê Meclîsê Şarê Kurdî Agît Karataşî qisey kerd. Karataşî vat: ''Bi azadîya Rayber Apoyî meseleya kurdan eşkena bêra çareserkerdene. Dewleta tirke ya faşîste derheqê çareserî qale bikera zî bi kerdişanê xo mojnena ra ke nê pêro xapînayîş o. Şaredarîye kurdan ameyî xespkerdene, vera Rojawanî hêrişî yenê kerdene û reyna cezaya hîrê mengan a qedexeyê pêvînayîşî dîyaye Rayber Apoyî. Ganî dezgehê eleqedarî yê Ewropa şirê Tirkîya ser ke Abdullah Ocalanî reyde dîyalog bêro destpêkerdene.''

Serekê Konfederasyonê Sendîkayan ê Dundee yê Skoçya Mike Arnottî  zî veng da dezgehanê mîyanneteweyîyî, Yewîya Ewropa, Konseya Ewropa Komîteya Vergirewtişê Îşkenceyî ya Ewropa (CPT) ke semedê newera destpêkerdişê pêvînayîşanê hukmatê tirkî û Rayber Apo û PKKyî têbigêrê.

Bi nameyê Têgêrayîşê Cinîyan ê Kurdan ê Ewropa Aso Kamalî zî vat: ''Tecrîdê serê Rayber Apoyî sîyasetê qirkerdişî yê vera kurdan bi xo yo. Bêrê ma pêro pîya vera na neheqîye bivejîyê.''

Badê qiseykerdişan bi hezaran kurdîstanijî û dostê înan sey kortejî ver bi Meydanê  Picadilly Circusî rayra şîyî. Kurdîstajan kuçeyo tewr sixletî û popyler ê Londonî Oxford Circus bi slogananê ''Ocalanî rê azadîye'' zimna. Girseyî yew fekî ra marşê “Çerxa Şoreşê” vate. Çalakîye Piccadily Circus de  bi slogananê “Bijî Serok Apo”qedîyaye.