Hemserekê Komeleyanê Elewîyan ê Demokratîkan (DAD) Musa Kuluyî derheqê destbendkerdişê Hemsereka DADî Kadrîye Dogan, endamanê DADÎ û partîyanê sîyasîyan de ANFyî rê qisey kerd.

Kuluyî vist vîrî ke tarîxê komare de tim îqtîdaran hêrişê muxalîfan kerdo û vat: ''Elewîyî seba îqtîdaran hedefê verên ê. Elewîyî û kurdî tim bîyî hedef. Îqtîdar ê kesê ke sunî û tirk nîyê xo rê sey dişmenî vîneno. Coka ganî her kes vera nê îqtîdarê zorbazî xo ver bido. Tarîxê Komara Tirkîya seba elewîyan tarîxê zulmî yo. Dewleta tirke tim waştêne ke elewîyan dîzayn bikera. 

Weçînayîşê gulane şeklî bîyî. Rewşa Meclîsî werte de ya. Şaredarîyê ma hetê qeyûman ra yenê îdarekerdene, polîtîkaya înkarî dewam kena, Dewa Madimakî ameye betalkerdene. Erdogan game bi game Îslamê sîyasîyî rêxistin keno. Dibistanan rê îmamî yenê tayînkerdene, Dîyanet sey merkezê fetwayan xebitîyeno. No îqtîdar dişmenê ma yo. Wazeno ke êyê ke tirk û sunî nîyê çin bikerê.''

Musa Kuluyî ard ziwan ke rêxistinîya elewîyan serranê peyênan de aver şîya coka dewlete û îqtîdar înan ra aciz bîyê. Kuluyî îfade kerd ke yeno waştene ke elewîyî krîmînalîze bibê û bitersê. Kuluyî vat: ''Sey elewîyan bawerî û rayîrê ma musnenê ma ke bedelê ci çi beno wa bibo ganî ma rayîrê raştî de şorê û xo ver bidê.''