Serdozger Pettersonî kombîyayîşê çapemenîye de ke roja sêşemeyî bi hawayêkê gandarî televîzyon de weşanîya, da zanayene ke Stig Engstomî Serekwezîrê ê çaxî yê Swêdî Olof Palme kişt. Merkezê Komelê Demokratîkî yê Kurdan ê Swêdî derheqê babete de eşkerayîyêka nuştekîye daye.

Eşkerayîye wina ya: ''Seba Swêd rojêka tarîxî ya. Goreyê eşkerayîyanê dozger Krister Peterssonî hînî ma zananê ke Olof Palme hetê kamî ra ame kiştene. Olof Palme pêro dinya de sîyasetmedarêko bitesîr bi. Olof Palmeyî paştî da welatanê xizanan û nê pawitî. Palme bi dostê Afrîka, herêmîyanê Amerîka, şaranê Filîstîn, Kurdîstan, Latîn Amerîka û Vietnam.Seba ke qederê xo biweçînê rayîrê nê şaran akerdî. Seba têkoşînê şarê kurdî zî paştî da û xeylêk pêvînayîşî lerdî. Palmeyî îfade kerdêne ke kurdî bi hawayêkê bêrehmî binê teda û zorbazî de yê. Heyf o ke kişîyayîşê Olof Palmeyî bi gamêk ke Swêd de têgêrayîşê azadî û demokrasî yê kurdan bêro sûcdarkerdene.''

Eşkerayîye de ame vatene ke xîretê krîmînalîzekerdişê PKKyî o çax Swêd de û xeylêk welatanê Ewropa de dewam kerd û bi nê hawayî neheqîya ke 34 serran ra nata kurdan rê ameyêne kerdene qedîyaye.

Eşkerayîye wina dewam kerd: ''Têkoşînê azadîye pê terorî ame sûcdarkerdene. Ma dezgehanê sîyasetî ra pawenê ke uzrê xo biwazê.  Ma pawenê ke rêxistin û komeleyê ma sûcdarîya 'sûc/terorî' ra bêrê azadkerdene. Ma wazenê ke dewleta tirke ya ke rayberîya ci Erdogan keno seba teda û zorbazîya vera şarê kurdî bi hawayêkê eşkerayî bêra şermezarkerdene.''