Kurdê Almanya mucadeleyê huqûqî de bîyî serkewte

Mahkemeya îdarî ya Dusseldorfî qerar da ci ke rayîrraşîyayîşê NAV-DEM’î bi hewayêko qanûnî nêameyo qedexekerdene û no qerar qanûnî nîyo.

Merkezê Komelê Kurdan o Demokratîk ê Almanya, binê banê xo de xeylî komeleyan temsîl keno û rêxistinê Kurdan o tewr pîl o. Dewleta Almanya, bi faalîyetanê krîmînalîzekerdişî ameyêne NAV-DEM’î ser û xebatê ci asteng kerdene. Bi taybetî zî serranê 2017-2018’î de Wezaretê Karanê Zereyî agahînameyî erşawitî îdareyanê eyaletan û bi no qeyde xebatê NAV-DEM‘‘i bi hewayêko keyfî ameyî astengkerdene.

Agahînameya Wezaretîye de NAV-DEM sey parçeyê girêdayîye PKK’yî amebi nîşandayene û pêro mîtîng û aktîvîteyê Kurdan, bin o qeyde ameybî qedexekerdene. Qedexeyo verên serra 2018’î de Dusseldorf de ame destpêkerdene.  Pêro sazîyê Kurdan bine banê NAV-DEM’î de ameyî Têhet û waşt ke vera îşxalkerdişê Tirkîya yê Efrînî protesto bikerê û no sebeb ra yew mîtîng organize kerdîbî. La polîsan agahînameya Wezaretê Karanê Zereyî nişan daye û mîtîg kerd qedexe.

'RAYÎRRAŞÎYAYÎŞÊ KURDAN GANÎ NÊRÊ QEDEXEKERDENE'

NAV-DEM’î nê qerarê keyfîyi ver muracatê mahkemeye kerd na dawa de qerar ame dayene. Mahkemeye qedexekerdişê mîtîngê Kurdan bêqanûnî dî û va mabênê PKK û NAV-DEM’î de xeylî ferqî estî. Serekê mahkemeye wina qisey kerd: “ Rayîrraşîyayîşo ke bi nameyê ‘Efrîn de şer bêro vindertene‘ menga Sibate de, ganî bi beşdarîya 2 hezar kesan biameyêne viraştene hetê polîsan ra ameyo qedexekerdene. Polîsî goreyê hewayê qanûnîyî tê nêgêrayê. Her kes û hetî eşkenê heqanê xo yê rayîrraşîyayîş û mîtîngî bîyarê ca û ganî heqê înan bi hewayêko keyfî nêro qedexekerdene.“