Dadîyê Nobeta Edaletî seba ke tecrîdê vera Rayberê Şarê Kurdî Abdullah Ocalanî biqedo çalakîyanê 'Veng Bidê Azadîye' rê dewam kenê. Dadîya 

Beşdaranê çalakîyanê 'Veng Bidê Azadîye' ra Afîfe Kartala de dadîya tepişte Muhammed Kartalî ya ajansê ma rê qisey kerd.

Afîfe Kartal îfade kerd ke ê dewaya Rayberê Şarê Kurdî domînenê û vat: ''Domananê ma rayîrê ey de ganê xo feda kerdo. O rayberê 50 milyon kurdan o. Wa tecrîd wedarîyo; Rayberê Şarê Kurdî de pêvînayîş bêro kerdene. Eke Birêz Ocalan qisey bikero, ciwanê ma do nêmirê, xozaya ma nêra qirkerdene, krîz û şerî zî do biqedê. Dewlete ziwan, kultur, xoza û heywananê ma qetil kena.''

Dayîke Afîfe vist vîrî ke 13ê teşrîna verêne de Amed de vera tecrîdî mîtîngêko pîl do bêro kerdene û wina venga kurdan da ke tewrê mîtîngî bibê: ''Kurdê ke wayîrê rûmetî yê ganî vera tecrîdî vinderê û vengê xo berz bikerê.''

Dayîke Afîfe bale ante ser ke rewşa tepişteyanê nêweşan bena giranêr û vat: ''Wa cade tepişteyê nêweşî bêrê tehlîyekerdene. Vera kurdan dişmenîye yena kerdene. Ez nêweş a la ancî zî şina çalakîyan. Eke ma ewro vengê xo nêvejê siba do erey bibo. Wa pêro kurdî yew bibê, wayîrê têkoşînî vejîyê û bi kayanê AKP-MHPyî mexapîyê. Wa her kes tewrê mîtîngê 13ê teşrîna verêne bibo. Ma seba azadîya Birêz Ocalanî vengê xo vejê.''