Konseya Kurdan a Swîsre (CDK-S) û Têgêrayîşê Cinîyan ê Swîsre (YJK-S) bi eşkerayîyêka hempare venga pêro kurdîstanijan û dostanê înan da ke 6ê çeleyî de seba protestokerdişê Qirkerdişê Parisî tewrê rayraşîyayîşê merkezî bibê. Eşkerayîye de dîya zanayene ke seba rayraşîyayîşê Parisî 5ê çeleyî de xeylêk şaristananê Swîsre ra 5ê çeleyî de otobusî do ver bi Parisî bikewê rayîrî.

Hemsereka CDK-Syî Selma Surer ajansê ma rê qisey kerd.

Selma Surer îfade kerd ke Paris de di qirkerdişan de cinîyê kurdî yê serkêşî hetê dewleta tirke ra ameyê hedefkerdene û vat: ''Ma sey cinîyan ê kurdan do her ca de paradîgmaya azadîye ya Rayber Apoyî bipawê. Bi qirkerdişan ê do nêeşkê şorişê ma bin bivisnê. Ma do her ca de hesabê nê qirkerdişan bipersê. Yeno waştene ke sereyê Qirkerdişanê Parisî bêro girewtene. Ma do bi israrî vajê 'Paris mîyanê tarîtîye de yo, edalet kamca de yo?' Ma sey cinîyan ê kurdan bi têkoşînê xo do na taritîye roşnî bikerê. Nê esasî ser o ma wazenê ma sere de cinîyî venga pêro kurdîstanijan danê ke 6ê çeleyî de tewrê rayraşîyayîşê merkezî yê Parisî bibê. Şaristanê ke tede meclîsê ma est ê, nînan ra ma şarê xo bi otobusan berê Parisî.''

Selma Surer ard ziwan ke şaristananê Cenevre, Lozan, Biel, Bern, Zug, Luzern, Solothurn, Aarau, Basel, Zurich, St.Gallen, Winterthur û Rapperswilî ra otobus û wesayîtê taybetî 5ê çeleyî de wurzê we.