Endama Konseya Rayberdişî ya KCKyî, Emine Kara (Evîne Goyî), Hunermend Mîr Perwer (Mehmet Şirin Aydin) û welatperwer Abdurrahman Kizilî yê ke 23ê kanûne de paytextê Fransa Paris de ameyî qetilkerdene, pê merasîmêkê bêhempayî şawîyayî Kurdîstan.

Cenazayê ke Dezgehê Tibê Edlî yê Parisî ra ameyî girewtene pê konvoyî ameyî berdene Palace de Villiers Platz ke tede merasîm ame kerdene. Heyata merasîmî saetanê serê sibayî ra hetê xeylêk temsîlkaranê dezgehanê kurdan û sîyasetmedaranê ewropayijan ra ameye dekerdene.Cenazaya Evîne Goyî şawîyaye Başûr û cenazayê Mîr Perwer û Abdurrahman Kizilî şawîyayî Vakur.

Hemserekanê Konseya Kurdanê Demokratîkan ê Fransa  (CDK-F) Xane Akdogan û Abdullah Ulmezî semedê xurtkerdişê têkoşînî veng da û vat Erdogan û paştgêrê ci sekenê wa bikerê ê do binkewê.

Hemşaredarê Sarcellesî M. Patrick Haddadî zî dejê xo yê semedê hîrê şehîdan ard ziwan û vat ê do tim paştî bidê merdimanê şehîdan û şarê kurdî yê Ewropa.

Hemserekê KONGRA-GELî Remzî Kartalî Qirkerdişê 9ê Çeleyî nîşan da  û vat: ''Rayber Apoyî wextê nê qirkerdişî de vatbi 'Ma do qesasê înan pê çînkerdişê faşîzmî bikerê.' No wîna qirkerdişêko gird o ke têna wina qesasê ci yeno girewtene. Dewleta tirke vera şarê kurdî heme polîtîkayê xo yê qirkerî fînayî dewre. Semedê îmhakerdişê kurdan heme îmkanê xo seferber kerdî. La têkoşînê şarê ma nê hêrişî betal kerdî.''

Kartalî semedê roşnîkerdişê qirkerdişan veng da hukmatê Fransa û vat: ''Mîyanê des serran de serkêşê têkoşînê azadîye nê welatî de ameyî qetilkerdene. Cinîyê ke serkeşîya cinîyan ê dinya kenê, qey Paris de yenê hedefgirewtene? Ma soz danê şehîdanê xo; ma do têkoşînê Kurdîstan û têkoşînê azdîye yê cinîyan girdêr bikerê. Ma do tarîtîye roşnî bikerê.  Serra 2023yî do biba serra binkewtişê faşîzmê AKP-MHPyî. Serewtiş do yê ma bo.''

Merdimanê şehîdan zî qala têkoşînê şehîdan kerd û vat: ''Ê çend ma qetil bikerê zî ma do çirey çok medê, milê xo çewt mekerê.''

Besîme Koncaya ke bi nameyê TJK-E qiesey kerd, semedê roşnîkerdişê qirkerdişî veng da û vat: ''Ma dişmenê ke Sakîne Cansiz, Fîdane Dogan, Leyla Şaylemez, Jiyane Tolhildan, Evîne Goyî, Hevrîne Xelef, Garîbe Gezer, Nagîhan Akarsel, Denîze Poyraz û Jîna Emîmî qetil kerdî, ma nê  dişmenî hole sarisnenê. Ma reyna soz danê ke ma do pê înşakerdişê konfedaralîzmê cinîyan qetilkaranê cinîyan ra hesab bipersê. Ma do îtîfaqê 'jin jiyan azadî' yo ke heme dinya de berz beno, girdêr bikerê.''

Hunermend Xelîl Xemgînê ke bi nameyê TEV-ÇANDî qisey kerd ard ziwan ke dewleta tirke estbîyayîşê xo serê çînkerdişê şarê kurdan vînena û vat ê do deyîranê Mîr Perwerî her ca de vajê.

Dostanê kurdan ê fransizan zî merasîm de qisey kerd, dejê xo ard ziwan û waşt wa qirkerdişî bêrê roşnîkerdene.

Badê qiseykerdişan cenazaya Emîne Kara şawîyaye Mexmûr, cenazaya Abdurrahman Kizilî şawîyaye Qers û cenazaya Mîr Perwerî şawîyaye Mûş.