Bi  hezaran kesî semedê yadkerdişê Endama Konseya Rayberdişî ya KCKyî Emine Kara (Evîne Goyî), muzîsyen Mîr Perwer (M.Şîrîn Aydin) û Abdurrahman Kizilî yê ke paytextê Fransa Paris de ameyî qetilkerdene, verê Merkezê Kulturê Kurdan ê Ahmet Kayayî ra ver bi Merkezê Enformasyonî yê Kurdan rayra şîyî.

Merdimê kesanê ke qirkerdiş de ameyî qetilkerdene vernîya kortejî de fotografanê şehîdan kiriştî. Çalakvanî bi slogananê "Şehid namirin", Bijî Serok Apo" û Jin Jiyan Azadî qîrayî.

Vervatoxê Dîplomasîyî yê CDK-Fyî Agît Polatî verê Buroyê Enformasyonî yê Kurdan de xîtabê şarî kerd. Polîtî veng kerd Serekkomarê Fransa Emmanuel Macronî  ke wa Qirkerdişê 9ê Çeleyî eşkera bikero ke verê qirkerdişanê neweyan bêro girewtene.

Bi nameyê TJK-Fyî zî Berîvane Firat qisey kerd. Firate vat: ''Eke şima qirkerdişê vizêrî eşkera bikerdêne, ewro Evîne, Mîr û Abdurrahmanî dinyaya xo nêbedilnayêne. Êyê ke guleyî nanê sereyê ma ya, cewabê ma înan rê wina yo; Ma çok nêda, ma do çok medê.''

Çalakîya ke binê varayîşî de ameye kerdene hunermendê TEV-ÇANDî zî pê sazê Mîr Perwerî tewrê ci bîyî.

Rayraşîyayîş de semedê tewrbîyayîşê rayraşîyayîşo ke siba do verê komele ra ver bi Wezîrîya Edaletî bêro kerdene, ame vengdayene.