Paytextê Fransa Paris de vera Merkezê Kulturê Kurdan ê Ahmet Kayayî hêrişo çekdar ame kerdene. Sîyasetmedara kurde  Evîne Goyî (Emine Kara), Hunermend Mîr Perwer û welatperwer Abdurrahman Kizil hêrişî de şehîd bîyî. Bado ke xebera hêrişî ameye eşnawitene xeylêk welatanê Ewropa ra kurdan verê xo da Parisî.

Kurdistanijî û dostê înanê ke saetanê rewî yê serê sibayî verê Merkezê Kulturê Kurdan ê Ahmet Kayayî de ameyî têhet bi sloganan qirkerdiş protesto kerd. Saetanê nêmroje de zî sey di kurtejan ver bi meydanê Republique  pê slogananê "Bijî Serok Apo", "Şehîd namirin", "Ey şehîd xwîna te erde namîne”, "Jin jiyan azadî", "Bimre xiyanet" rayra şîyî.

Rayraşîyayîş de pankartê "Ma do qesasê xo bi şorişê cinîyan bigêrê" ameyî akerdene û pOsterê Rayberê Şarê Kurdî Abdullah Ocalan û fotografê Sakîne Cansiz, Fîdane Dogan û Leyla Şeylemez ê ke 9ê çeleyê 2023yî de Paris de ameyî qetilkerdene, ameyî kiriştene.

Xeylêk temsîlkarê sîyasîyî yê kurdan, wekîlê Fransa, serekê şaredarîyan û temsîlkarê partîyanê sîyasîyan tewrê rayraşîyayîşî bîyî. Çalakwanan pê sloganan, çapik û tîlîlîyan hêrsê xo ard ziwan û veng da hukmatê Fransa ke wa qirkerdişî eşkera bikero.

Meydan de verî bi nameyê Konseya Kurdan a Fransa Berîvane Firat qisey kerd. Firate şehîdî yad kerdî û vat: ''Seba ke qetilkarê Sara, Rojbîne û Ronahî nêameyî eşkerakerdene û qirkerdişo bîn ame kerdene. Ma do hesabê nê bipersê.''

Dima ra merdimê kesanê ke ameyî qetilkerdene vejîyayî sehneyî ser û veng da hukmatê Fransa ke wa qirkerdiş bêro eşkerakerdene. Keyeyan vat: ''Heme dinya wa bizano ke  şarê kurdî çirey çok nêda û ewro ra tepîya zî çok medo.'' Hemserekê Kongra Gelî Remzî Kartal û Endama TJK-E Zozane Serhat qisey kerd û semedê roşnkerdişê qirkerdişî veng da.

Mîtîng de Wekîlê Parisî Sylvain Maillard, Serekê Şaredarîya Parisî yê 10. Alexandra Cordebard û Serekwekîlê  Baroyê Parisî Vincent Nioré  de qisey kerd mesajê paştdayîşî dayî.  Serekwekîlê Baroyê Parisî Vincent Nioréyî vat: " No têna cînayetêko nîjadperest nîyo, no hêrişêko plankede yo, hêrişêkê terorî yo."

Reyna qiseykerdoganê bînan bale ante têkoşînê kurdan û hêrişê vera kurdan ser û veng da selahîyetdaranê Fransa ke wa no qirkerdiş zî tarî de memano.