Wekîla HDPyî Fatma Kurtalan heyetê teslîmê esîranê Oremar de ca girewtbi û aye xeylêk rey keyeyanê esîranê Garê de pêvînayîşî kerdbi û babete berdebî rojdemê Meclisî.

Kurtalane ANFyî reyde qisey kerd û ardi ziwan ke keyeyanê esîran bi rayîrê ÎHDyî xo resnabi înan û vat: ''Ma Meclîs de babete tim viste rojdem. Keyeyan seba ke weş û war biresê domananê xo çend reyan venga ÎHD û Meclîsî kerd. La dewlete xo kerd kor û kerr û keyeyan reyde têkilîye naye ro. Dinya de operasyonêko winasên ê xelisnayîşê esîran çin o. Ma wexto ke Oremar de esîrî girewtî DTP, PDK, YNK, Amerîla kewtbî dewre. Ma dîyalogî kerdbi. Nê esîrî 2 hewteyan ra dima teslîmê heyetî ameybî kerdene. O çax vera DTPyî kampanyaya lînçî estbî la ma reyna zî mesuldarî girewte xo milî. Verî zî metodê winasênî şuxilîyabi. Dewlete eşkayêne yekser têkilîya muxatabîye biviraştêne. Pê vatişê 'ez hînî muxatab nêvînena' nêbeno.''

Kurtulane da zanayene ke rewşêka winasêne de hedfkerdişê HDPyî nêno qebulkerdene û eşkera kerd ke mesuldarê nê mergan AKP-MHP yê. Kurtulane vat: ''Ma verî zî pare kerbi ke ma amade yê ardim bikerê. Îqtîdar nêeşkneo mesuldarîya xo bierzê milê sewbîna merdiman. Îqtîdarî nêrazîbîyayîşê vera operasyonî sey firsendêkê parçekerdişê muxalefetî dîyî. Îqtîdar xîret keno ke partîyanê muxalefetî cîya bikerê, krîmînalîze bikerê.''

Kurtulane ard ziwan ke înan faturaya mergan HDPyî ra birnaye la HDP vera ney zî sereyê xo nêaro war û têkoşînê xo dewam bikero.

Kurtulane peynîya qiseykerdişê xo de îfade kerd ke ê wazenê seba cigêrayîşê operasyonê Garê komîsyonêk bêro awankerdene û mesuldarî do hesab bidê.