Leşker û polîsê ke seba weçînayîşî kirişîyayî Qersî bajarî ra vejîyayî
AKP-MHP seba ke Qers de îradeyê şarî xesp bikero, bi xîleyan ser bikewo polîs û leşkerî kiriştî Qersî. Nê weçînitoxê sexteyî bi otobusan bajarî ra vejîyayî.
XÎLEYÊ WEÇÎNAYÎŞÎ
Îqtîdarê faşîstî yê AKP-MHPyî weçînayîşê cayîyî yê 31ê adare de sey xeylêk bajaranê bînan ê Kurdîstanî Qers de zî teberê bajarî polîs û leşkerê xo kiriştî bajar ke bi xîleyan ser bikewo.
Badê şuxulnayîşê rayan nê leşker û polîsê ke teberê bajarî ra ameyî ardene ewro bi otobusan agêrayî.Weçînitoxê sexteyî rayîrê Selîm û Qamûşanî de ameyî vînayene.
Weçînayîşê roja yewşemeyî de bi nê rayîrê xespî MHPyî 16 hezar û 384 û DEM Partî 13 hezar û 120 raye girewtî. Ferqê mabênê wird partîyan 3 hezar û 264 o.
DEM Partî tesbît kerdbi ke 3 hezar û 842 polîs û leşkerî kirişîyayî bajarî.
