Lîbya de Hukmatê Yewîya Neteweyîye (HMN) û Meclîsê Temsîlkaran o ke nêzdîyê Artêşa Neteweyîye ya Lîbya (ANL) adirbirnayîş pare kerd. Labelê wird terefê şerî zî seba madeyan qerqilîyenê. 

Serekwezîrê HMNyî es-Serraco ke dewleta tirke paştî dana ci û Serekê Meclîsê Temsîlkaran Akîle Salih 21ê tebaxe de bi hawayêkê hemwextî cayanê cîyayan de eşkerayîyî dayî. Neteweyê Yewbîyayeyî (NY), Amerîka, Yewîya Afrîka, sere de Misir welatê ereban pê adirbirnayîşî kêfweş ê la Tirkîya pê adirbirnayîşî qayîl nîya.

Madeyê adirbirnayîşî yê sey ''Herêmê petrolî Sîrte û Cûfra bêçek bêrê veradayene.'', ''Berardişê petrolî newe ra do dest pêbikero'', ''Hêzê xerîbî û leşkerê bipereyî do Lîbya ra vejîyê.'', ''Serra 2021î de weçînayîş do bêro kerdene'' wird terefanê şerî qerqilnenê.

Serekê Forumê Kurd-Almanî Yûnis Behranî rewşa peyêne ya Lîbya ANFyî rê ercnaye û ard ziwan ke adirbirnayîş cara do bêtesîr bimano. Rojnameger û sîyasetmedarê Misirî Ehmed Şêxoyî zî da zanayene ke her di terefî zî wazenê bineyna wext bivisnê destî.

Yûnis Behramî vat: ''Madeyê vetişê leşkeran ê xerîb û bipereyan Tirkîya keno teng. Eke adirbirnayîş bêro îmzakerdene Tirkîya do Lîbya ra vejîya û cerganê xo zî Lîbya ra bigêra.  Yanî Tirkîya Lîbya ra cewabo ke waştêne nêgirewt.''

Ehmed Şêxoyî vat: ''Vernîyazê adirbirnayîşî aslê xo de esasê planê DYA yo. Coka çew nêeşkeno vajo pê adirbirnayîş qayîl nîyo. La her kes madeyanê ci goreyê xo şîrove keno û çew nêwazeno masa biterikno.

Yûnis Behramî derheqê madeyê Sîrte de nê çîyî vatî: ''Bêçekkerdişê Sîrte zî madeyê vera Tirkîya û Rûsya yo. Tirkîya ra nêbp Serrac û Rûsya ra nêbo Hafter nêeşkeno çîyêk bikero.''

Rojnameger Ehmed Şêxoyî da zanayene ke madeyê petrolî zî planêkê DYA yo ke şîrketanê înan vindarnayîşê berardişê petrolî ra zerar dî. Yûnis Behramî zî ard ziwan ke Hafter do nêverdo ke Serrac pereyê petrolî bigêro. 

Adirbirnayîş de Sîrte sey xeta sûre ya ke herêma petrolî ya. Madeyê adirbirnayîşî wazeno ke Tabrûk û Trablusî ra ber merkezêk bêro awankerdene. Sîrte zî seba merkezê neweyî yeno ercnayene.

Yûnis Behramî eşkera kerd ke eke Sîrte biba merkez Hafter do hêzêr bo û dewleta tirke zî coka nê madeyî qebul nêkena.

Ehmed Şêxoyî derheqê vernîyazê pêkerdişî de vat: ''Goreyê mi no pêkerdiş do nêro caardene. Wird terefî zî seba ke xo xurtêr bikerê pêkerdiş sey firsendêk vînenê.''

Serekê Forumê Kurd-Almanî Yûnis Behramî zî vat: ''Adirbirnayîşî ra rojêke dima Tirkîya ver bi Lîbya dest pê sewqîyatê cerganê Sûrîye kerd. Cewabê Tirkîya yê seba adirbirnayîşî wina yo. Eke adirbirnayîş bêro caardene xeyalê osmanijan do birijê. Na rewşe  herêman rê ke binê îşxalê dewleta tirke de yê, tesîrê domînoyî bikera.''