Lîbya de prosesê adirbirnayîşî dest pêkerd. La semedo ke cerganê xo Lîbya ra apey nêancena Tirkîya proses kena giranêr. Tirkîya heta nika seba xapînayîşî tay cergî erşawitî Sûrîye la tewr tay hezar cergê dewleta tirke hema zî Lîbya de yê. Nê cergê sûrîyeyîjî seba leşkeranê tirkan nobete gênê û kampan de perwerdeyê leşkerî vînenê.

Tay selahîyetdaranê herêmîyan ê Lîbya ANFyî rê qisey kerd û derheqê trafîkê nê cerganê dewleta tirke de agahîyê xurtî dayî. Goreyê nê agahîyan nê cergî pê teyarayan Îstanbulî ra erşawîyayî Trablusî, kampan de ameyî cakerdene û erşawîyayî cepheyan.

Selahîyetdaran eşkera kerd ke adirbirnayîşî ra dima zafê koman ê neweyan Kampa Yermukî de ca bîyî. Cergê kampanê leşkeran ê tirkan zî nobeta kampe gênê. Kampa Yermukî de perwerdeyo leşkerî dîyeno cergan.

Çimeyanê ma da zanayene ke nê cerganê 'Artêşa Mîllî' qaşo 200 hezar dolar bigirewtêne la dewleta tirke nêmeyê pereyê înan birna û taloq kerd.

Çimeyêkî/e vat: ''Êyê ke wazenê abigêrê bertil da fermandaran. Lîbyayîjî sûrîyeyîjan ra nefret kenê û nêwazenê nînan Lîbya de bimanê. Zaf cergî wazenê abigêrê la dewleta tirke nînan Lîbya de zêdêr vindarna.''

Heta nika dewleta tirke xeta Efrîn-Ezazî ra 12 hezar û 835 cergî erşawitî Lîbya. Nînan ra têna 1226 cergî agêrayî Sûrîye. Ma resayî lîsteya nameyanê 2 hezar û 700 cergan ke nê cerhî Tirkîya ra erşawîyayî Lîbya. Agahîyê ke ma cigêrayîşanê xo de resayî ci wina yê:

Tugayê Hamzayî û Tumenê Sultan Mûradî: Sultan Muradî 1722 û Tugayê Hamzayî ra 1810 cergî erşawîyayî Lîbya. Nînan 12 rojan şaristanê Kîlîsî yê Tirkîya de perwerde dî.

Tugayê Şax Suleymanî: Nînan ra 1910 cergî reyna Berê Sînorî uê Hawarî yê Kîlîsî ra erşawîyayî Lîbya.

Tugayê Mutasim Bîllahî: Nînan ra 150 cergî perwerde ra dima erşawîyayî Lîbya. 150 cergê înan ê bînî zî herêmanê Îdareyê Xoserî yê Rojawanî de ameybî cakerdene la hêrişê vera baregehê El Watîya ra dima nê zî erşawîyayî Lîbya.

Tugayê Siqur El Şimalî: Nînan ra 430 cergî reyna Kîlîs ra erşawîyayî Lîbya.

El Tesha (9): 150 cergê na kome Kîlîsî ra erşawîyayî Lîbya û nînan ra 50 kesî zî Tirkîya de perwrerde dîbî.

Feyleq El-Mecid: 978 cergê na kome perwerdeyî ra dima Kîlîsî ra erşawîyayî Lîbya.

Ancî Tugayê El-Mutasêmî ra 1170, Cêş El-Watanî ra 600, Feyleq El-Rehmen ra 790, Ehrar El-Şerqiyê ra 600, Cêş El-Islem ra 585, Lîwa El-Weqas’tan 400, Lîwa Semerqend ra 350 ra, Feyleq El-Şamî ra 365, Heyêt Tehrîr El-Şamî ra 80, Foc 113 ra 25 cergî erşawîyayî Lîbya.

Çimeyan pare kerd ke mîyanê Artêşa Mîlî ya Sûrîye (SMO) xeylêk cergê DAÎŞî zî ca gênê û bi taybetî bale anye koma Ebu Yeqzan Misrîyî. Temamîya na kome cerganê DAÎŞî ra yena meydan.

Dewleta tirke cergê 'Artêşa Mîllî' verî amade kerdî dima zî Berê Sînorî yê Hewarî ra erşawitî Lîbya. Nê cergî pabesteyê ê komanê ke ma cor de rêz kerdî.

Tirkîya na serre mîyanî de tay cergî Lîbya ra apey antî la herinda nînan de cergê neweyî erşawitî. 4ê sibate de 150, 9ê sibate de 60 cergî Kîlîsî ra erşawîyayî Lîbya. Par zî dewleta tirke Cindirêsî ser o 400 cergî erşawitî Lîbya.

Dewleta tirke 23e çeleyê 2020î de seba sewqê leşkeran tezkere girewte û Lîbya rê Sûrîye ra cergê 'Artêşa Mîllî' erşawitî. Seba erşawitişî cergan verî Efrîn de 4 merkezî ameyî akerdene.

Destpêkê 2020î ra nata dewleta tirke tewr tay 18 hezar cergê 'Artêşa Mîllî' erşawitî Lîbya. Nînan ra tewr tay 12 hezar û 835 cergî xeta Efrîn-Ezazî ra verî erşawîyayî Tirkîya û Tirkîya ra zî erşawîyayî Lîbya. Girê Sipî û Serêkanîyê ra zî xeylêk cergî ameyî berdene bi Lîbya. Şerê Lîbya de tewr zaf cergê Tugayê Hamzayî kişîyayî.

Mabênê Hukmatê Mutabaqatî yê Neteweyî (UMH)yo ke Tirkîya paştî dana ci û Meclîsê Temsîlkaran de 23ê teşrîna verêne ya 2020î de adirbirnayîş ame îmzakerdene. La alozîya Lînbya dewam kena. Seba ke krîz û alozîye biqedê ganî leşkerê beyanî û cergî Lîbya ra vejîyê. Tirkîyaya ke tewr zaf cergê ci Lînbya de yê, nêwazena xo Lîbya ra apey bianca.