Hetkarê Serekê Partîya Keskan û Wekîlê Parlamentoyê Swîsre Nicolas Waldero ke beşdaranê Hemleya 'Abdullah Ocalanî rê Azadîye, Meseleya Kurdan rê Çareserîye' ra yew o ANFyî rê tecrîdê Îmraliyî û girîngîya azadîya Rayberê Şarê Kurdî Abdullah Ocalanî ercnayî.

Walderî şertê tepişîyayîşê Ocalanî sey tecrîdêko sîyasî pênase kerd û vat: ''No tecrîd armanc keno ke Ocalan nêeşko xo îfade bikero û enerjîya xo vindî bikero. Tecrid yew metodê îşkenceyî yo ke nêno qebulkerdene. Tirkîyaya ke îmzadarêka peymananê mîyanneteweyîyan ra  yew a, goreyê nînan tênêgêrena.''

Walderî rexne kerd ke çira Komîteya Vergirewtişê Îşkenceyî (CPT) raporê xo yê serê Îmraliyî eşkera nêkena. Walderî vat: ''Eke no rapor lehê hukmatê Erdoganî de bibîyêne do biameyêne eşkerakerdene. Na rewşe mojnena ke heqê Ocalanî yenê binpaykerdene.''

Walderî Abdullah Ocalanî sey aktorê verênî yê muxatabê çareserîya meseleya kurdan ercna û var: ''Şarê kurdî paştî dano Ocalanî. Sey Ocalanî ê lîderê ke wayîrê meşrûtî û hûrmetê şarî yê eşkenê haştîye awan bikerê. Seba ke tecrîd biqedo ganî dewleta Swîsre zî mesuldarîya bigêra xo ser û tedaya dewleta tirke bikera.''

Walderî bale ante Hemleya Azadîye ser û vat: ''Ganî na hemle rê paştî bêra dayene. Ewropa alozîya Rûsya û Çînî ra nêwazena dewleta tirke de nîqaş bikera. Coka verê qewimîyayîşanê Tirkîya de bêveng manena. Meseleya kurdan ganî nêra peygoşkerdene. Dewleta tirke Rojawan de vera kurdan sûcanê şerî kena. Ma venga Swîsre û pêro dewletanê Ewropa danê ke verê nê sûcan bigêrê. Heqê dewleta tirke çin o ke sînoranê xo ra teber hêrişê şarêkê bînî bikera.''