Dewleta Tirkî 19’ê Tebaxe de şaredarîyê hîrê bajaranê pîlan ê Amed, Wan û Mêrdînî yê HDP’yî xesp kerdî. Şarê Kurdî a roje ra nata meydanan de yo. Parlamentera Partîya Sosyal Demokrate ya Almanya Krîsten Luhmanne zî seba ke paştî bida HDP'yî ameye Amed. Luhnmanne derheqê xoverdayîşê Kurdan ê vera xespê qeyûmî de Anf'yî rê qisey kerd.

Luhnmanne ard ziwan ke ê zî polîtîkayê qeyûmanê Tirkî nêzdîye ra taqîb kenê û va: ‘‘Wexto ke weçînayîşê 31'ê Adare de hemşaredarê Kurdî amebî weçînayene,  ez zaf şay bîya. Ez pê bawer a ke hemşaredarê  weçînayeyî seba ekonomî zerrîye ra do bixebitê. Ez tayînkerdişê qeyûman ê şaredarîyanê Amed, Wan, Mêrdînî ra qet razî nîya. Ez seba ke paştî bida hemşaredaranê Kurdan awil şîya Mêrdîn, dima ez ameya Amed. Ez zî sey çalakgerêke Amed de û verba qeyûmî de ya. Ma rewşa Tirkîya tim taqîb kenê, delîlêk çin o ke nê şaredarîyanê  Kurdan paştî daya rêxistinan. Ganî dewlete na îddîaya xo îsbat bike. Semedê tedayan ma nêeşkenê verê Şaredarîya Pîl a Amedî de  çalakîye bikê. Cinî, camerd, ciwan, doman herkes wayîrê îradeyê xo vejîyenê. La hûmara polîsan hûmara çalakgeran ra hema hema di rey zêdêr a. Meydan hetê polîsan ra ame dormegirewtene. Meseleyê Kurdî yê Tirkîya têna pê rayîrêko demokratîk û haştîyane yenê çareserkerdene. Meseleyê Kurdî pê şîdet û şerî çare nêbenê. HDP seba çareserîyanê nê meseleyî rolêk û mîsyonêk girewt serê xo. Ganî nê welatî de herkes pê ziwan û nasnameyê xo biciwîyo."