Hemserekê Pêroyî yê KESKî Mehmet Bozgeyîkî bale ante ser ke doneyê TUÎKî yê derheqê bêkarîye de raşt nîyî û vat: Ma bêkarîye û feqîrbîyayîşî rê rî bi rî yê.

Bozgeyîkî vat: ''Prosesê pandemî de bi mîlyonan kedkaran Tirkîya de karê xo vînî kerd. Goreyê hûmara tewr peyêne ya bêkaran se ra 13,4 a. La TUÎK bizanayîş kesê ke prosesê pandemî de bêdestmiz îzîn kenê, karî ra vejîyayî û cigêrayîşê karî ra hêvîya xo birnaya, înan tewrê îstatîstîkanê xo nêkeno. Coka doneyî tay ê. Îqtîdar hem serê hûmaranê enflasyonî ra hem zî hûmaranê bêkarîye ra manîpulasyon keno. Kenê  ke her çî hol ramojnê. Wazanê ke îspat bikerê ke prosesê pandemî de Tirkîya krîz nêkewta.''

Bozgeyîkî bale ante doneyanê Rêxistina Xebate ya Mîyanneteweyîye (ÎLO) ser û vat: ''Eke goreyê standartanê ÎLOyî hûmarê bêkarîye bêrê destgirewtene Tirkîye de bêkarîye ser ra 30 a. Nizdê di 2 mîlyonan tengkerdişê îstîhdamî esto. Sey heme dinya welatê ma de zî ma bêkarîye û feqîrbîyayîşî rê rî bi rî yê.''

Bozgeyîkî vist vîrî ke butçeya 2021 zî sey ê verênan ê wextê îqtdarê AKPyî xizmetê şarî nêkena û vat: ''Butçeya tewr pîle semedê şerî û dîyanetî xerc kenê. Sey her wextî semedê berardiş, perwerde, weşîye butçeya qîmkerde çîn a. Ganî wextê amadekerdişê butçe de rêxistinê karî, rêxistînê komelî yê demokratîkî  partîyê ke meclîs de yê zî tede cayê xo bigerê û pêro pîya amade bikerê. Zafê butçe ganî bidîyo kedkar, şar û weşîye. Butçeya ke dîyena dîyanetî temamîde butçeya 8 wezîrîye ra zafêr a. Butçeya 2021î butçeyêka demokratîke nîya û paştî nêdana şarî. Butçe polîtîkayanê şerî rê yena xerckerdene  û coka semedê karkeran, cinîyan û domanan feydeya ci çîn a. Coka ganî heme hetê komelkî pêro pîya vera naye têkoşîn bikerê.''