Zindanan de bişîarê 'Rayber Apoyî rê Azadîye, Meseleya Kurdan rê Çareserîye' 27ê teşrîna peyêne de grevê vêşanîye dîyabi destpêkerdene. 4ê Nîsane de xoverdayoxanê zîndanan çalakîya xo ya grevê vêşanîye kirişte merhaleya bîne. Xoverdayoxanê zîndanî bi eşkerayîyêke da pêhesnayen eke ê do mevejîyê mehekemeyan, pêvînayîşan û telefonan.

Xoverdayoxanê zîndanî ra Leyla Uyanik a ke Zîndanê Qefilnayeyî yê Cinîyan ê Sîncanî de yena tepiştene ajansê ma rê qisey kerd. Qiseykerdişê Leyla Uyanik ra qismêko kilm wina yo:

" 27ê  kanûna peyêne ra nata zîndanan de têkoşînêk est o. Ez verî xoverdayoxanê zînanan ê ke rixmê heme şertanê zoran xover danê selam kena. Reyna sere de Dayîke Haştîye û heme şarê ma û hetê demokrat û sosyalîtî yê ke tebere de vengê xoverdayoxanê zîndanan danê eşnawitene, ez înan zerrîya safî ra selam kena.

Gama ke ma dest pê grevê vêşanîye kerd ma Wezîrîya Edaletî û Mecls û cayanê sey înan rê  vaştişname şawitbi û vatbi eke waştişê ma merê caardene ma do nê prosesî bikirişê merhaleya corîne. Naye ser o tam çar mengî ravîyartî. Grevê ma yê vêşanîye bi mengan kerd derg la qet gamêkê nêameye eştene.

Ma waşt wa tecrîdo giran ê serê Rayberê Şarê Kurdî Abdullah Ocalan bêro wedaritene ke rayîrê haştîye yê Rojhelatê Mîyanênî bêro akerdene. Ma waşt wa meseleya kurdan bi rayîrê demokratkî bêro çareserkerdene. Na çalakîye de xeylêk xoverdayoxanê nêweşan ca girewt ke înan qet hesabê ameyoxê xo û azadîya xo ya şexsî nêkerd. Nê pêro, seba ke şarê kurdî dahîna erey mekewo û bireso azadîya xo. Ma waşt wa Birêz Abdullah Ocalan sey temînatê tewr pîlî yê haştîye nê prosesî de rolê xo kay bikero.

Ma qey nêvejîyenê pêvînayşî? Çunke Rayberê ma Birêz Abdullah Ocalan des serrî yo nêeşeno nê heqê xo bişuxulno. Qey ma nêvejîyenê telefonî? Çunke Birêz Abdullah Ocalan 25 serran de rayêke o zî têna panc deqa eşka telefon de qisey bikero. Qey ma nêvejîyenê mehkemeyan? Çunke heqê huqûqîyî yê Birêz Abdullah Ocalanî yenê binpaykerdene.

Ma herinda milê xo çewtkerdişî de wazenê rayîrê têkoşînî de yo ke Abdullah Ocalanî kirişt merdimîye, ser bikewê. Coka ma vanê ma şertanê Rayberîye de ciwîyenê. Şarê ma ganî bibo vengê nê xoverdayîşî. Rayapêroyîye ra waştişê ma no yo. Eke ma hîs û fîkranê xo bi çalakîyan biresno pê ma eşkenê rayîrê haştîye û azadîye abikerê. Ez hêvî kena ke ma pêro pîya nê rayîr de biresê rindîye û kam ke kede daye û ma pêrune rê serkewtiş wazena."