Endama Komîteya Rayberdişî ya PKKyî Hêlîne Umît Medya Haber TV de bernameyêkê taybetî de rojdem ercna.

Ercnayîşanê Hêlîn Umît ra tayê noqtayê girîngî wina yê:

''Ez xoverdayîşê Îmraliyî yê Rayber Apoyî selam kena. Têgêrayîşê ma û şarê ma 27 serrî yo vera Komployî têkoşîn keno. Nê 27 serran de ame waştene ke îradeyê şarê kurdî bêro çinkerdene. La îradeyê Rayber Apoyî destûr nêda ney. Herinda Rayber Apoyî de rayberêko bîn est bibîyêne nêeşkayêne hende xo ver bido.

Serekwezîrê Îtalya yê verênî Massimo D'Alemayî seke îtîraf kerd tayê çîyî vatî. Ey vat ke Amerîka tedaya Îtalya kerda. Ganî huqûqnasî vera îdareyê Amerîka yê ê çaxî têbigêrê. Komployî bi giranî tesîrê şarê kurdî kerd, şarê ma texrîb kerd.

Hemleya 'Rayber Apoyî rê Azadîye, Meseleya Kurdan rê Çareserîye' seba caardişê azadîya Rayber Apoyî girîng a. Na hemle hemleyêka global a. Coka ganî hîna bi xurtî bêra caardene.

Sere de Herêmanê Pawitişî yê Medya de Kurdîstan de şer dewam keno. Serekê Şerî yê dewleta tirke vato ke heta teşrîna peyêne ê do gerîlayan kilîd bikerê. La teşrîna peyêne hayo ameyo. Gerîlayî newe ney 40 serrî yo şer kenê û wina lez nêqedîyenê.

Xakurkê, Metîna, Zap, Avaşîn de dewleta tirke bi destekê PDKyî baregehanê xo nana ro. A raşte dişmen her roje derbanê giranan weno la ney eşkera nêkeno. 2015 ra nata dişmen bi se hezaran reyî bombardumanî kerdî, çekê kîmyewîyî şuxilnayî. Şer giran beno. Wa her kes naye bizano. 

Çeteya Yenidoganî mojnena ke exlaqê komelî senî pûç bîyo. Polîtîkayanê îqtîdarî û dewleta tirke qestî ra exlaqê komelî hedef kerd. Xora komelo ke azad nîyo wayîrê exlaqî zî nêbeno. Seke Rayber Apoyî vatbi azadîye çin ba exlaq û polîtîka zî do çin bê.

Muxalefetê Tirkîya zî vera îqtîdarî bitesîr nîyo. Heta nika muxalefetî babeta meseleya kurdan de qiseyêko bitesîr zî nêvat.

Nika her kes prosesêkî ra qal keno. Bahçelîyo ke mîmarê qirkerdişê kurdan o, şino destê wekîlanê DEM Partî gêno. No çîyêko normal nîyo. Wa çew Bahçelîyî ra çîyêkê xeyrînî nêpawo. MHP û Bahçelî bê menfaetî çîyêkî zî nêkenê. Cora MHP partîya gloadioyî ya. Bahçelî vera-vera eşkerayîyan dano la tede cidîyet çin o. 

Nika Rojhelatê Mîyanênî de şerî est ê, welat de zî nîqaşê serê Qanûnê Bingeyî est ê. Her kes hêdî hêdî nîyetê xo eşkera keno. Tayê kesî raşta zî wazenê ke meseleya kurdan çareser biba. La vera hêzanê haştîye yê sey HDPyî operasyonî yenê kerdene. 

Mîsal nîqaşê serê çekverdayîşî est ê. Vanê ke wa PKK çekanê xo teslîm bikero. Nê vengî Amerîka ra yenê. Vanê ke dewlete Qendîl de û Rayberîye de pêvînayîşan kena. Çîyo winayên çin o.

Wa her kes hol bizano ke eke ewro kurdî est ê no xêrê gerîlayan û têkoşînê çekdarî ra yo. Vanê ke Vakur de PKK çin o. La o çax çira her roje operasyonî yenê kerdene.

13ê teşrîna verêne de Amed de şarê ma îradeyê xo eşkera kerd; azadîya Rayber Apoyî û çareserîya meseleya kurdan waşte. Gerîlayî zî ney wazenê û seba ney şer kenê. Ciwanê kurdî rûmetên ê. 

Şerê Îsraîl-Filîstînî ra nata yeno waştene ke dinya de duzenêko newe wa bêro ronayene. Beno ke siba ney bîr Îran û Îsraîl do pêbikewê. Tirkîya tersena ke na rewşe de rolê xo yê stratejîkî vinî bikera. Coka wazena ke şerê vera kurdan ra netîce bigêra. Çunke hinî no şer zor dana aye. Tirkîya tersena ke hêzê mîyanneteweyîyî paştî bidê kurdan. Ma do bivînê. Nê prosesî de ma sey PKKyî xora seba azadîye û demokrasîyî têkoşîn bikerê.

Şarê ma prosesêkê girîngî ra derbaz beno. Vera ma hêrişê giranî est ê, dinya bîya adir. Tehlukeyê cidîyî est ê. Eqlêkê ma est o ke o do ma biresnê serfîrazîye. Ma dormeyê nê eqlî de, dormeyê Rayber Apoyî de kom bibê, têkoşîn bikerê û ser bikewê.''