Çalakîya ''Sefîrxaneyê dinyayêka newîye: Kurdîstan'' şaristanê Lozanî yê Swîsre de roja yewine xo pey de verdaye.

Salona tîyatoyî ya Vidyî de roja yewine de di kargehî ameyî kerdene.

Kargeho verên 'Demokrasîya bêdewlete' bi. Endama KNKyî Nîlufere Koç, Ekonomîsto amerîkayîj David Adler û aktîvîsta heqanê merdiman Elisabethe Decrey Wander tewrê kargehî bîyî. Hunermend Jonas Staalî zî kargeh îdare kerd.

Nîlufere Koç îfade kerd ke projeyê Konfederalîzmê Demokratîkî yê Abdullah Ocalanî seba her kesî yo. Koçe vat: ''Ma dewlete red kenê çunke dewlete yena manaya hêzî. Ma sîstemê Konfederalîzmê Demokratîkî weçînenê. Dewletê neteweyî mîyanê krîzan de yê.''

David Adlerî ard ziwan ke şorişê kurdan hêvî dano dinya. Aktîvîste Warner zî çimdarîya xo ya serê Rojawanê Kurdîstanî pare kerdî û vat: 'Rojawan de cinîyî bingeyê sîstemî yê û ney zaf tesîrê mi kerd.''

Çalakîye de kargeho diyîn zî 'kolonyalîzmo bêdewlet' bi. Endama Akademîya Jineolojî û rojnamegere Necîbe Qeredaxî, avûkata hîndîstanije Varsha Gandikota û nuştoxa fransize Fatîma Oussak tewrê nê kargehî bîyî.

Necîbe Qeredaxî da zanayene ke kurdî vera hêrişanê dewleta tirke çarçewa modernîteya demokratîke de xo awan kenê. Necîbe vat: ''Dewleta tirke kurdan rê vana ke 'eke şima tewrê sîstemê mi bibê, eşkenê bibê her çî la eke wina nêbê ma do heqê ciwîyayîşî nêdê şima.' Tarîxê dewletan tarîxê komelan nîyo tarîxê sîstem û camêrdan o. Azadîya komelî pê azadîya cinîyan mumkîn a.''

Varsha Gandîkota pê hesna ke Rojawanê Kurdîstanî de seba dinyayêka bêsînore serkêşîya cinîyan de têkoşîn yeno kerdene. Fatima Ouassak zî qala têkoşînê afro-amerîkanijanê Fransa û multecîyan kerde.

Bernameyê roja yewine bi mojnayîşê fîlmê 'Kamî îdeolojî ra tersenê' û konserê Med-Derî qedîya.