Çimeyanê Munzurî yê Pulurî yê Dêrsimî de yeno waştene ke projeyêkê peyzajî bêro kerdene. Dêrsimijî vera projeyî nêrazîbîyayîşê xo mojnenê. Şar û rayberê elewîyî îfade kenê ke Çimeyê Munzurî seba elewîyan cayêko fîraz o û nêwazenê ke Çimeyî bibê cayê rantî.

Serekê Pêroyî yê Federasyonê Komeleyanê Dêrsimî (DEDEF) Alî Haydar Benî zî vera projeyî nêrazîbîyayîşê xo mojna. Benî derheqê projeyî de nê çîyî vatî: ''No proje serra 2017î de zî rojdem de bi. Ma o çax proje vindarna. Nika zî ma vera nê projeyî yê. Çimeyê Munzurî zî cara warê SÎTî yê.''

Benî da zanayene ke şar seba zîyaretî şino Çimeyan û qurbananê xo sere birneno. Benî vat: ''Eke ma wazenê Çemê Munzurî û Çimeyan bixelisnê ganî dewanê derûdoran de sîstemêk bibo. Ganî Munzur nêro lêşinkerdene. Nê projeyî de kamp, seyran û otoparkî estê. Wazenê bi rayîrê nê projeyî cayanê ma yê fîrazan ser o rant bikerê. Ma naye qebul nêkenê. Ma tim anê ziwan ke  ganî Çimeyanê Munzurî rê mudaxele nêro kerdene.

Cuntaya 12ê Êlule ra dima Dêrsim bi betonarme. Xoza û vîrê Dêrsimî ameyî çinkerdene. Amadekarê nê projeyî vanê ê fikranê Pîranê elewîyan gênê. Gelo nê pîrî kam ê? Ma do nê asîmîlasyonî qebul nêkenê. Ganî ma wayîrê Munzurî vejîyê. Eke wina nêbo siba ney bîr xebatê madenî zî do dest pêbikerê.''