Hêrişê îşxalî yê dewleta tirke yê vera herêmanê Avaşîn, Metîna û Zapî yê Herêmanê Pawitişî yê Medya dewam kenê. Îşxalkerî gerîlayan ra têdima derbeyan wenê. Hetê bînî ra çar leteyanê Kurdîstanî de paştî dîyena nê xoverdayîşî.

Çar leteyanê Kurdîstanî ra xeylêk partî, sazgeh û roşnvîran pîya eşkerayîya hempare ya çapemenîye daye. Eşkerayîya ke serê Zoomî ra ameye dayene de veng dîya ke wa pê ruhê xoverdayîşê Kobanê têkoşînê vera hêrişê îşxalî bêro pîlkerdene.

'Ganî PDK vengê şarê kurdî goştarî bikero'

Hemserkê KCK-E Yuksel Koçî vist vîrî ke şarê kurdî wextêkê tarîxî ra ravereno û vat: ''Ma sey şarê kurdî çirey hende azadîye rê nêzdî nêbîyî. Dewleta tirke coka hêriş kena. No hêriş têna vera PKKyî nêyo. Ganî PDK vengê şarê kurdî goştarî bikero û vera nê hêrişan bivejîyo.''

'Roje roja pîya têkoşînkerdişî ya'

Hemsereka Kongreya Neteweyîye ya Kurdîstanî (KNK) Zeynebê Murtat zî vat: ''Dewleta tirke wazena heme Kurdîstanî îşxal bikero. Semedê pawitişê destkewteyanê kurdan roje roja pîya têkoşînkerdişî ya. Ma sey KNKyî xoverdayîşê gerîlayan selam kenê û veng danê şarê kurdî ke wa wayîrê nê xoverdayîşî bivejîyo.''

'Erdogan nêweş o'

Wekîlê YNKyî yo verên Muhsîn Osmanî zî Erdogan sey 'mêriko nêweş' name kerde û vat: ''Hîtler û Mussolînî çi kerd, ewro Erdogan zî nînan keno. Erdogan nêweş o. Seba ke kurdî pîya tênêgêrenê dişmen nayî ra cesaret geno. Ganî ma hînî bibê yew.''

'Nê hêrişî eynî wextî vera herra Başûrê Kurdîstanî yê'

Temsîlkarê Têgêrayîşê Goranî yê Ewropa Meren Merawdalî zî vat: ''Nê hêrişî vera destkewteyanê kurdan yenê kerdene. Nê hêrişî eynî wextî vera herra Başûrê Kurdîstanî yê. Coka ganî Hukmatê Başûrê Kurdîstanî cade vera nayî têbigêro.''

'Ganî Kurdîstan bibo xeta ma ya sûre'

Wezîfedarê Perwerdeyî yê Unîversîteyê Londonî Osman Îsmalî vat: ''Senî ke vizêr armenî û suryanîyî qir kerdî ewro wazenê kurdan qir bikerê. Ganî Kurdîstan bibo xeta ma ya sûre û vera nê hêrişan pêro partîya kurdan bibê yew.''

'Erdogan dişmenê kurdan o'

Bi nameyê Partîya Komînîste ya Îranî Çîya Mohemedî zî qiseykerdişê xo de Masrûr Barzanî rexne kerd û vat: ''Ganî heme partîyê kurdan vînî ke Erdogan dişmenê kurdan o. Hêrişo ke ewro vera PKKyî beno siba do vera partîyêka bine bêro kerdene. Kam/e ça beno wa bibo ganî vera nê hêrişî vejîyo.''

'Game bi game Kurdîstanî îşxal kenê'

Rojnameger û nuştox Gunay Aslanî zî hêrişê îşxalî sey tehdîtê pîlî name kerdî û vat: ''No hêriş têna leşkerî û demkî nêyo. Game bi game Kurdîstanî îşxal kenê. Ganî hukmatê Başûrê Kurdîstanî nayî hole vînê. Beno ke ma cîya fikîryenê la ganî partîyê kurdan vera nê hêrişan bêrê têhet.''

'Çarserî yewîya kurdan a'

Endama Heyetê Rayberdişî yê PYDyî yê Ewropa Axîne Gulo zî vat: ''Meselaya kurdan pê çeke û şerî nêna çarekerdene. Çarserî yewîya kurdan a.''

Reyna xeylêk sîyasetmedar û nuştoxanê bînan zî babete ser o qisey kerd û veng da wa pê ruhê xoverdayîşê Kobanê têkoşînê vera îşxalî bêro pîlkerdene.