Merdimê tepişteyan seba ke bale biancê rewşa tepişteyanê nêweşan û tepişteyê ke rixmo ke cezaya înan qedîyaya nînê veradayene ser Amed û Wan de Nobeta Edaletî tepişenî.

Gulere Încîya ke nobeta Amedî de ca gena ard ziwan ke zextê vera tepişteyan her roje zêdîyenê û vat no zulm têna tepiştan rê merdimanê înan rê zî yeno kerdene. Încî semedê wayîrvejîyayîşê tepişteyan veng da û vat bêrê ma pêro pîya bibê vengê tepişteyan. Reşahate Ada zî vat ê do her ca de xoverdayîşî rê dewam bikerê û çirey çalakîya xo cameverdê. Fevzîye Kolakan û Nuraye Abay zî vat wa hinî zîndanan ra cenazayê domananê înan mevejîyê.

Çalakîya nobete ya Wanî de zî bi hewayêkê qerardarî dewam kena. Cinîya tepişteyê nêweşî Ebedîn Abîyî Zubeyde Abî zî tewrê çalakîye bîye. Endamanê Meclîsê  Ciwanan ê HDPyî çalakwanî zîyaret kerdî.  Arjîne Tuncera ke bi nameyê ciwanan qisey kerd, bale ante çalakîyanê edaletî yê bînan ê Keyeyê Şenyaşarî û Gulîstane Doku ser û vat bi têkoşînî do tewr peynî de edalet bêro caardene. Tuncere vera hêrişanê vera zîndanan ê ke bi hewayêkê sîstematîkî yenê kerdene ser û vat nê hêrişî rîyê tecrîdê  vera Rayberê Şarê Kurdî Abdullah Ocalanî ra yenê kerdene. Merdimanê tepişteyan ra Meryeme Abî zî vat ê têna semedê merdimanê xo nê semedê heme tepişteyan edalet wazenê.