Înîsîyatîfê 'Seba Kurdan Edaletî' yo ke tede wayîra Xelata Nobele nuştoxe Elfriede Jelinek, fîlozof Slavoj Žižek, pisporê hiqûqê mîyanneteweyî Prof. Norman Paech, Sekretero Pêroyî yê EUTCCyî Prof. Michael M. Gunter, endama ronayoxe ya Rêxistina Mayanê Plaza de Mayo Nora Cortinas zî tede xeylêk kesayetê namdarî ca gênê, seba ke PKK 'lîsteya terorî' ya Yewîya Ewropa ra bêro vetene kampanya rê dewam keno.

Beşdaranê Kampanyaya 'Înîsîyatîfê Seba Kurdan Edaletî' ra komelnas Ueli Mädero ke wayîrê Xelata Eric Frommî yo derheqê qedexeyê vera PKKyî de ANFyî rê qisey kerd.

Ueli Mäderî derheqê kampanya de wina qisey kerd: ''PKK seba mi rêxistinêka polîtîk û sîyasî ya. Bi serran o şer dewam keno, ganî no şer bi hawayêkê sîyasî bêro çareserkerdene. Seba ney zî ganî rayîrê sîyasî bêrê weçînayene. Seba çareserîya sîyasîye zî şert o ke na rêxistine bêra qebulkerdene û goreyê krîteranê demokratîkan nêzdîbîyayîşêk bêro mojnayene.''

Ueli Mäderî bale ante ser ke mehkemeyanê Belçîka û Luksemburgî bire daye ke ''PKK rêxistinêka terorî nîya'' û ard ziwan ke na bire seba înan girîng a. Ueli Mäder îfade kerd ke seba ke Tirkîya endama NATOyî ya PKK hema zî mîyanê lîsteya terorî de yena verdayene û vat: ''PKK Swîsre de û Neteweyanê Yewbîyayeyan de lîsteya terorî de nîya. Seba PKK mîyanê na lîste de ya meseleya kurdan bêçareserîye verdîyena. Krîmînalîzekerdişê PKKyî şert û mercanê çareserkerdişê meseleya kurdan giran keno. Teda û hêrişê vera mesele bi nê hawayî yenê meşrûkerdene. Coka ganî qedexe bêro wedaritene.''

Ueli Mäderî da zanayene ke kitabê ke Rayberê Şarê Kurdî Abdullah Ocalanî zîndan de nuştê ey wendî û vat: ''Seba çareserkerdişê na mesele qetî Ocalanî reyde pêvînayîşî bêrê kerdene û Ocalan tewrê prosesî bêro kerdene.''