Tecrîdê vera Rayberê Şarê Kurdî Abdullah Ocalanî her ke şino beno giranêr. Vera tecrîdî û seba azadîya Ocalanî Hemleya 'Abdullah Ocalanî rê Azadîye, Meseleya Kurdan rê Çareserîya Sîyasîye' 10ê teşrîna verêne ya 2023yî de hetê dostanê kurdan ra dîyabî destpêkerdene.

Wekîla Parlamentoyê Swîsre Laurence Fehlmann Rielle derheqê tecrîdê Îmraliyî, Hemleya 10ê Teşrîna Verêne û girîngîya azadîya Rayberê Şarê Kurdî de ANFyî rê qisey kerd.

Laurence da zanayene ke tecrîdê Îmraliyî îşkence yo û vat: ''Ma zanenê ke Ocalan serranê dergan ra nata nêeşkeno keye û avûkatanê xo bivîno û tepişteyanê Îmraliyî ra xeberêke zî nêna girewtene. Ma na babete de vernîyazêk dabi parlamentoyî. Ma armanc kenê ke nê tecrîdî bikerê rojdemê Konseya Federale û mîyanê rayaumûmîye de refleksêkî virazê. Sere de Swîsre ganî pêro dewletê Ewropa vera tecrîdî têbigêrê û vera Tirkîya teda bikerê. Ma zanenê ke CPT şîyo Tirkîya la Îmrali zîyaret nêkerdo. No tewir ma zaf qerqilneno û dano şikkerdene.''

Laurence ard ziwan ke Rayberê Şarê Kurdî Ocalan seba kurdan sembolê azadîye yo  û vat: ''Şarê kurdî hûrmetê Ocalanî keno. Ocalan seba çareserîya meseleya kurdan zî sey aktorêkê esasî yeno dîyene. Seba ke Swîsre seba azadîya Ocalanî têbigêra ma vernîyazê xo dabi. Mabênê tecrîd û hêrişanê vera Kurdîstanî de yew eleqe est o. Tecrîd de israr, şer de israr o. Azadîya Ocalanî do biba gamêka çareserîya meseleyan.''

Laurence bale ante ser ke Hemleya Azadîye hemleyêka girîng a û vat: ''Şert o ke seba azadîya Ocalanî dewletê Eworpa, Swîsre û komelo mîyanneteweyî têbigêrê. Bi nê hawayî hemle hîna manadar bena. Ganî hêverî tecrîd biqedo. Ocalano ke sey Mandelayê ewroyînî yeno dîyene ganî bibo  azad. Coka na hemle hêvîya azadîye ya. La hema rayîrê ma derg o û ganî seferberîye dewam bikera.''