Qezaya Şehzadelerî ya Manisa de Endamê HDPyî Sabrî Soyu wextoke agêrayêne keyeyê xo 2 kesan hêrişê ci kerd.

Soyuyî derheqê hêrişê nîjadperestî de wina vat: ''Ez kargeh de xebitîyena. Ez saete 17:00 de servîsî ra peya bîya û mi telefon kerd embazê xo. Wexto ke ez resaya kuçe 2 kesî ameyî hetê mi û înan vat 'Ti vanî se?' Mi vat ' ez bi kurdkî telefon de qisey kena.' Dima mi telefon qefilna. Înan mi rê vat 'Ti tirkî qisey bikerî ma do to fambikerê.' Ma nîqaş kerd. O çax înan mi rê vat 'Yani ti vanî hol a ke ti tirk î yan zî ti şinî cehenem.' Dima înan da mi ro. Bedenê mi de rêçê derban estê. Mi nêweşxane ra zî rapor girewt. Siba ez do şora gerreyê înan bikera.''