Mayer: Ganî ma domananê DAÎŞ’îyan bîyarê Almanya

Xeylî hemwelatijê Almanya yê ke bi weşîye kewtê destê YPG‘yî estê Almanya nêzana ke nê hemwelatijanê xo se bikero. Şewirmendê wezîrê karanê zereyî Stephan Mayerî no derheq de va ganî ma tena domananê DAÎŞ’îyan bîyarê Almanya.

Destê YPG‘yî de 2700 DAÎŞ’îyê esîrî estê û nê kesî hepisxaneyê cîya – cîya yê Rojawan  de yenê girewtene. Nê 2700 DAIŞ’îyan ra 800’ê xo hemwelatijê 46 welatanê cîya cîyayan ê û zêdeyêrê înan zî hemwelatijê Ewropaye yê.

Îdareyê Parîsî çend rojî têgêrayî ke hemwelatijanê xo yê DAÎŞ’îyan bîyarê Fransa û bivejê mehkeme. Hukmatê Almanya yê Federalî no derheq de hîna beyanatêko fermî nêdayo. Destê YPG’yî de 100 hemwelatijê Almanya yê DAÎŞ’îyî estê û zêdeyêrê nînan zî doman û cinî yê.

Destê YPG’yî de 15 DAIŞ’îyê ke hêzê ewlekarîye yê Almanya ci ra gêrenê estê. No derheq de hukmatê Almanya, îdareyê Rojawanî de qet têkilîye nênaya ro. Hukmatê Merkele ra yew îdarekarî no derheq de beyanatêko newe da çapemenîye.

 ‘Ê YÊ KE IRAQ U TIRKÎYA RA EŞKENÊ AGÊRÊ ALMANYA‘

Musteşarê wezîrê karanê zereyî Stephan Mayerî rojnameyê Bîldî rê qisey kerd. Mayerî mulaqat de va ‘DAÎŞ’îyê ke Iraq û Tirkîya de yê eşkenê agêrê la no qerar seba ê yê Surîye de yê, seba înan derbaz nêbeno. ‘Mayerî va tena domanê mayan ê Almanijan ê endamanê DAÎŞ’î eşkenê bêrê.’ 

Mayerî şert û mercê Surîye nîşan dayî û va, Elmanijê ke destê YPG’yî de yê bi raya konsolosxaneyî nêeşkenê bigîrê. La Mayerî va seba ke domanê hemwelatijanê Almanya, seba ke destê înan de bi hewayêkê radîkalî nêrê perwerdekerdene, ganî bêrê girewtene. Îdarekarî va domanê ke maye û pîyê xo Alman ê û Surîye de ameyê dinyaye, hemwelatijê Almanya yê û wina dewam kerd: “Ganî nê domanan rê alaqeyêko taybet bêro musnayene. No zî wezîfeyê daîreya ciwanan o. Ganî ey nê barî bigîrê xo dest.“

Hêzanê YPG’yî, hewteyê verî de Dêra Zor de yew Almanij o DAÎŞ’î weş pêgirewtbi. Nameyê ney kesî Martîn Lemke bi û o bi xo şefê çeteyanê DAÎŞ’î bi. DAÎŞ’î de grûba îşkence û îstîxbaratî de ca girewtêne. Xeylî kesî hepisxaneyanê DAÎŞ’î de bi destê Lemkeyî ameyê kiştene.  

DAÎŞ’ÎYAN SER 5 WELATÎ YPG’YÎ REYDE XEBETÎNÊ

Heta nika Endonezya, Rûsya, Fas û Sûdanî, bi hewayêkê fermîyî, îdareyê Rojawanî ra hemwelatijê xo yê DAÎŞ’î yê ke destê YGP’yî de bî waştî. Tewr peynîye de Fransa çapemenîye de yew qerar weşanabi û vatbi 130 endamê DAÎŞ’î yê hemwelatijanê xo do bigîrê.