Serekwekîlanê Koma Partîya Têdûştîye û Demokrasîyî ya Şaran (DEM Partî) Gulîstane Kiliç Koçyiqit  û Sezai Temelli û wekîlanê partîye verê meclîsî de  derheqê Dewaya Kobanê de eşkerayîye daye û dima ra ver bi Wezîrîya Edaletî rayra şîyî.

Gulîstane Kiliç Koçyigit eşkerayîye de nê vatî: "Îqtîdarê AKP-MHPyî xeylêk wext o wazeno ke serê Dewaya Kumpasî ya Kobanê ra sîyasetî dîzayn bikero. 7ê hezîrana 2015 de HDP bi 80 wekîlan kewt meclîs û AKP raya verêne nêeşka têna bibo îqtîdar. A roje AKP, MHP û Ergenokî planê vera kurdan fîna dewre ke HDP bêro tesfîyekerdene û destkewteyê kurdan destê ci ra bêrê girewtene.Kobanê zî leteyêkê nê planî yo. Na dewa 6 serrî cuwa pê bîlasebeb ameye akerdene. Nika na dewa ra bilaheq ceza dîyaye embazanê ma.  Manîdar o ke eynî roje generalê dewaya 28ê Sibate ameyî veradayene.

Ame waştene ke serektişê HDPyî yê 7ê hezîrene û paradîgmaya ci ya cuyeya nêewî  bêro mehkumkerdene. La 16ê gulane de roniştişê Sincanî de dî ke o ruh sereberz payra yo. HDP û şarê kurdî têna nîyo. Ma veng danê ke wa heme hetî bêrê têhet û vera nê rejîmî têkoşînî xurt bikerê. Wa çew polîtîkayanê çokdayîşî yê îqtîdarî meterso, ma pêro pîya têkoşîn de bêrê têhet ke verê nê zextan bîgerê. Ma veng danê şaranê Tirkîya, ma zanê pêro zanê ke Fîgene Yuksekdag û Selahattîn Demîrtaş û embazê ma yê bînî bêsûc ê. Ma do ewro ver bi Edaletê Wezîrîye rayra şinê, veng danê ci ke wa na bêadaletîye, no sîstemo helisîyaye werte ra wedarîyo.''

Badê eşkerayîye rayraşîyayîş ame kerdene. Rayraşîyayîşî ra dima verê Wezîrîya Edaletî de Sezaî Temellîyî qisey kerd.

Temellîyî nê vat: "Wezîrîya Edaletî est a la edalet çîn o. Tirkîya de her kes cigêrayîşê edaletî de yo. Sebebê nê heme bêadeletîyan eslê xo de tecrîd o. Îqtîdaro ke bi şer û çaresernêkerdişê meseleya krudan wazeno payra bimano narey zî kumpasan keno. Ma qeraranê Dewaya Kobanê nas nêkenê.

Çunke no kumpas o, çunke no rejîm vano qey wina eşkeno payra bimano la no rejîm do birijîyo. Senî ke Selahattîn Demîrtaş û Fîgenê Yuksekdag wextê dewa de rejîm muhakeme kerd, ma zî do pêro pîya nê têkoşînî xurt bikerê û nê rejîmê kumpasî birijnê. Nika wextê girdkerdişê hêvî yo, wextê eştişê game yo. Ma veng danê heme rayapêroyîye bêrê ma pêro pîya vera nê kumpasî vinderê û welatî biresnê edalet û azadîye."