Meclîsê Ciwanan ê Partîya Çep a Keske derheqê dewrê neweyî de Anqara de ame têhet. Ciwanan verê kombîyayîşî bi eşkerayîya çapemenîye da eşnawitene ke înan vera tecrîdî kampanya daya destpêkerdene.

Eşkerayîye de wina ame vatene: ''Polîtîkayê ke îqtîdar rayra beno, polîtîkayê dişmenîya vera şarî yê. Polîtîkaya şerî polîtîkaya tewr pîle ya dişmenîye vera şarî ya. Îqtîdarê AKP-MHPyî 2015î ra nata teber û zereyê welatî de  bêmabên vera kurdan şer keno. Bingeyê krîzanê welatî de no şer est o. Bingeyê şerî de tecrîdê Îmraliyî est o.  Tecrîdê serê Rayberê Şarê Kurdî Abdullah Ocalanî beno sebebê şerî û şer zî feqîrîye û sefaletî ano. Coka Îmrali de Abdullah Ocalan nê şarê Tirkîya binê tecrîdî de yê.  Heme komelê Tirkîya Îmrali de bênefes yeno verdayene. Şexsê Rayberê Kurdî de serê heme şaranê Rojhelatê Mîyanênî de polîtîkaya tecrîdî yena rayraberdene.  Ma na polîtîka qebul nêkenê, ma do miheqeq nê tecrîdî bişiknê.

Îqtîdar wazeno komelî bi zextê bieciqno û vera ciwanan zî polîtîkayanê şerê taybetî rayra beno. Bi hewayêkê sîstematîkî sere de ciwanê kurdan heme ciwanê Tirkîya bi metodanê mermikan sey spor, huner û fîlman raştê bombardumanê îdeolojîkî yenê. Bi nê metodan wazenê ciwanan bikerê koleyê sîstemî. Çîyo tewr tehluke yê şerê taybetî zî madeyê kungkerdişî û fuhuşî mîyanê komelî de vil kenê. Bi destê unîformayîyan vera cinîyan ê ciwanan tacîz û tecewuzî yenê kerdene. Ma do sey ciwanan vera nê kerdişan bêveng memanê. Ma do berpirsîyarîye bigerê û nê sîstemî bibedilnê.

Ma tîya a danê eşnawitene ke ma vera her qeyde metodanê şerê taybetî kampanyaya '''Vera şerê taybetî têkoşîno biheybet' danê destpêkerdene û ma do dewrê neweyî na çarçewe de bidomnê. Ma do dewrê neweyî de sey Meclîsê Ciwanan heme hemrayanê xo yê çepgîr, sosyalîst, şorişgêran reyde têkoşînê xo xurtêr bikerê.  Heta şiktişê tecrîdê serê Abdullah Oclaanî ma do têkoşînê xo rê dewam bikerê. Ma do vera madeyê kungkerdişî, talanê ekolojî, asîmîlasyonê kulturkî û heme metodanê ke ciwanan û komelî erjanê ci ra raqilnenê vinderê. Semedê nê ma veng danê heme ciwanan ke wa çarçeweya na kampanya de vera şerê taybetî têkoşînê biheybetî bikerî.''