Komaya Meclîsî ya Partîya Demokrasî û Têdûştîye ya Şaran (DEM Partî) xespkerdişê Şaredarîya Colemêrgî kursuyê Heyetê Pêroyî yê Meclîsî de protesto kerd.

Wekîlê  DEMî yê Colemêrgî Verzîr Parlakî derheqê pêşnîyazê cipersayîşê semedê taxrîbatê qeyûmî de qisey kerd. Dima wekîlê DEM Partî pîya bi pankartanê ''Şaredarîyî yê ma yê, ma destûrê xespî nêdanê'' vejîyayî kursu.

Rixmê îkazkerdişê Serekwekîla Meclîsî Gulîzere Biçer Karaca wekîlan kursu canêverda. Des deqayî maben dîya heyetî. Nê wextî de çend wekîlanê CHPyî zî paştî daye.

Serekwekîla Koma DEM Partî Gulîstane Kiliç Koçyîgît Heyetê Pêroyî yê Meclîsî de qisey kerd. Koçyîgîte bale ante xespkerdişê îradeyê şarî ser û nê vatî: ''Bi operasyonê çeteyan, bi rejîmê qeyûmî ma rî bi rî yê. Heşt serrî yo îradeyê şarî çîn hesibyeno. Heşt serrî yo no îqtîdar nê şarî ra wîna vano, 'Şima hemwelatî nîyî', 'raya şima û bajaranê sey Yozgat  û Tekîrdagî yew nîya.' Ma tîya ra persernê, normalbîyayîş ho ça, nermbîyayîş ho ça? Normalbîyayîşê AKPyî qeyûm, zulm, zext, tehdît o, xespkerdişê îradeyî, talan o. No îqtîdar dişmenê kurdan o. Nêwezano kurdî xo bi xo îdare bikerî. Ma sond wanenê ke ma do teslîm mebê; şima do bin bikewê. Ma do bi ruhê Gezî, paştdayîşê Kobanê ser bikewê.''

Wekîlanê AKPyî waşt pankartanê wekîlanê DEMî bîgêrê. Arbede wekîlî ginayî erdî ro. Wekîlanê AKPyî pankartî dirnayî û eştî.Wekîlanê DEM Partî bi sloganan cewab da herişê AKPyijan û pêrodayîş vejîya.