Qezaya Riha ya Xelfetî de îtîrazê AKPyî ser o bire dîyaye ke weçînayîşî newe ra bêrê kerdene. Hemşaredarê Xelfetî Mehmet Karayilanî ard ziwan ke dewlete bi pêro îmkananê xo bêusûlîye kerda.
Weçînayîşanê 31ê adare de qezaya Xelfetî ya Riha de namzedê DEM Partî ser kewtbi. La îtîrazê AKPyî ser o weçînayîşê Xelfetî ame betalkerdene. Hemşaredarê Xelfetî Mehmet Karayilanî derheqê babete de ANFyî rê qisey kerd.
Karayilanî dîyar kerd ke ê do qetî Xelfetî ra fek vera nêdê û vat: ''Xelfetî de weçînayîşî bi hawayêkê normalî nêqewimîyayî. Qasê 400 rayê sexteyî est bîyê. Dewlete pêro îmkanê xo şuxilnayî, şantajî kerdî û merdiman rê pere vila kerd. Roja weçînayîşî de namzedê AKPyî Albayramî 100 endamê mafya ardî, înan wezîfedarê sindoqan derb kerdî. Tewr tay 1000 rayê blokî şuxilîyayî. Rixmê nê kerdişan zî ma şaredarîye qezenç kerde.''
Karayilanî dîyar kerd ke AKPyî tehamulê serkewtişê înan nêkerd û vat: ''Ma derheqê betalkerdişê weçînayîşî de têkoşînê xo yê huqûqî rê dewam kenê. Xelfetî wareyê Rayberê şarî û têgêrayîşê azadîye yo. Coka tîya seba şarê ma cayêko sembolîk o. Se beno wa bibo weçînayîş newe ra bêro kerdene zî ma do ser bikewê. Xelfetî do rayîr nêda ferasetê nîjadperestî.''
