Partîya Çep a Keske do 15ê teşrîna verêne de kongreya xo bikera. Endama Meclîsê Cinîyan ê Partîya Çep a Keske Menekşe Kizildere derheqê prosesê kongre de ANFyî rê qisey kerd.

Menekşe Kizildere da zanayene ke prosesê weçînayîşan ra dima înan xeylêk kombîyayîşê şarî, konferans û komxebatî kerdê. Menekşe îfade kerd ke nê prosesî sîyasetê înan ê cinîyan xurt kerdo û vat: ''Zengînîya nê nîqaşan netîcenameyê konferansê cinîyan de ameye dîyene. Netîcename de zî binpaykerdişê heqanê merdiman ra heta bi kede, ekolojî xeylêk waran de soz û planî est ê.''

Menekşe ard ziwan ke kongreya xo ra ê do hîna xurt vejîyê û vat: ''Kongre reyde teyna mîyanê partîye de ney heman wextî de rêxistinîyê herêmî zî bivurîyê. Tarîxê sîyasetî yê welatî de yew nimuneya ney çin a. Seba demokrasî partîya ma hêvî ya. Sîyasetmedarê ciwanî şitilanê neweyan çînenê. 

Ez eşkena vaja ke kongre ra dima ma do sîyasetêkê neweyî, hîna ciwan û dînamîkî bivînê. Prosesê peyê weçînayîşan de agahîyêka zaf xurte ya polîtîke ameye afernayene. Na agahîya polîtîke do têgêrayîşê ma hîna xurt bikera. Têgêrayîşê ma yo ke akademîyêka sîyasî ya, tim rayîr dano ciwanan, cinîyan û bindestan. No zî yeno manaya tecrubeyanê pîlan.''