Merdimê tepişteyan ke Wezîrê Edaletî yê Tirkî Yilmaz Tunçî reyde pêvînayîş kerd, qalê tecrîdê serê Rayberê Şarê Kurdî Abdullah Ocalanî kerd. Tunçî ke tecrîd red kerd ci rê raporî ameyî teqdîmkerdene.
Merdimanê tepişteyan û wekîlê DEM Partî Newroze Uysal û Dîlane Kunt Wezîrîya Edaletî de Wezîrê Edaletî Yilmaz Tunçî reyde pêvînayîş kerd.
Merdimanê tepişteyan pêvînayîş de qalê tecrîdê serê Rayberê Şarê Kurdî Abdullah Ocalanî û çalakîya tepişteyan a boykotî kerd. Wezîr Tunçî îdîa kerd ke tecrîd çîn o kerd ke vengê merdimanê tepişteyan bibornê ke biisrar qalê tecrîdî kerdêne. Merdimanê tepişteyan vat heta wedartişê tecrîdî ê do çalakîyan bikerî.
Wekîlanê DEMî zî vat tecrîd raporanê CPTyî de zî ameyo tespîtkerdene û qerarê tedbîrî yê Neteweyanê Yewbîyayeyan vist vîrê Wezîrê Edaletî yê Tirkî.
Wekîlan raporê tecrîdî yê Buroyê Huqûqî yê Asrinî yê 2023yî zî da wezîrî. Wekîlan derheqê bêhuqûqîye û neheqîya ke Îmrali de yena kerdene xeylêk raporê bînî zî dayî wezîrî.
