Merdimê tepişteyan seba ke bale biancê rewşa tepişteyanê nêweşan û tepişteyê ke rixmo ke cezaya înan qedîyaya nînê veradayene ser bi mengan o Amed de Nobeta Edaletî tepişenî. Merdimê tepişteyan roja 100. ya çalakîya xo de verê Dezgehê Tipê Edlîyî de ameyî têhet. HDP, MEBYA-DER,TUHAY-DER û MED TUHAD-FEDî zî paştî daye keyeyan.

Merdimanê tepişteyan ra Reşahate Ada ke semedê caardişê edaletî veng da vera ablûqaya polîsan hêrsê xo ard ziwan û vat: ''Wa hinî şîdet û zextê serê domananê ma bêrê qedînayene. Wa înfazê înan meveşîyo. Ma nêwezanê tîya ra cenazayanê domananê xo bîgêrê. Ma haştîye û edaletî wazenî. Ma dayîk ê û edalet wazenê. Cîgerê ma vêşeno. Ma do siba zî verê banê edlîye de bêro têhet û edalet biwazê.''

Merdimanê tepişteyan ra Încî Guler zî vat: ''Rixmo ke domanê ma 30 serrî yo zîndanan de yê nêdîyenê ma.  Rixmo ke serranê 90yan ra zîndan de yê û nêweş ê qanûnî nînê caardene. Goreyê qanûnan têbigêrê û domananê ma bidê.''

Merdimanê tepişteyan ra Nazîme Boltan zî seba ke êyê ke paştî danê înan ameyî astengkerdene hêrsê xo ard ziwan û vat:  ''Wina edalet û qanûn benê. Ma heq û huqûqê domananê xo wazenê. Ma vanê; edalet, edale edalet.

Eşkerayîye bi slogananê selamkerdişê xoverdayîşê zîndanan û xurtkerdişê têkoşînî qedîyaye.