Merdimê tepişteyan seba ke bale biancê rewşa tepişteyanê nêweşan û tepişteyê ke rixmo ke cezaya înan qedîyaya nînê veradayene ser Amed û Wan de Nobeta Edaletî tepişenî. Îstanbul de zî banê ÎHDyî de  her roja şemeyî sernameyê ''Ma zîndanan de mergan nêwezanê, cuya pawenê'' çalakîye yena kerdene.

Çalakîya ke hewteyê diyîne de ameye kerdene de qiseykerdişê akerdişî hetê Sereka ÎHDyî ya Îstanbulî Gulserene Yolerî ra ame kerdene. Yolerî ard ziwan ke heqê tepişteyan ê weşîye yeno astenkerdene û semedê cigêrayîşê rayîranê çareserî ameyî têhet. Dima ra merdimanê nêweşan qisey kerd. Qiseykerdişan de ame vatene ke seba ke qicê înan kurdê yenê cezakerdene û ame vatene ke  ê se kenê wa bikerê ne qicê înan ne zî ê do verê zextan de çok bidê. Merdimanê tepişteyan veng da merdimanê tepişteyanê bînan  û waşt pêro bibê yew ke qicanê xo bixelisnê. Dima ra bi tewrbîyayîşê Wekîlê HDPyî Omer Faruk Gergerlîogluyî terraqe ame kerdene. Gergerlîogulu bale ante binpaykerdişê heqan ê tepişteyan ser û vat ganî dewlete berpirsîyarîya xo bîyaro ca.