Zîndanê Mêrdînî de tay tepişteyan 21ê sibate de vera biran û kerdişanê keyfîyan û binpaykerdişanê heqan grevê vêşanîye dabi destpêkerdene. Her 10 rojan de yew komêka bîne grevê vêşanîye dewr gêna.

Roja 16. de tepişteyan Osman Akbaş, Halîl Bergîn û Mehmet Çîftçîyo ke yew dest û yew lingê ci çin o, grev dewr girewt.

25ê sibate de tepişte Îlhamî Îşçî Zîndanê Îslahîye rê, 7ê adare de Serhat dogan Zîndanê Erziromî rê ameyî surgunkerdene.

7ê adare de şan îdareyê zîndanî tay waştişê tepişteyan qebul kerdî. Goreyê agahîyanê ke avûkatan dayê îdareyî qebul kerd ke nêweşan sewqê nêweşxaneyî bibê û 'cigêrayîşê mîyanê fekî' biqedîno.

Tepişteyan ra Mehmet Şîrîn Acarî bi mektubêke waştişê înan Komîsyonê Heqanê Merdiman ê Baroyê Mêrdînî rê şawitî.

Mektube de ame vatene ke tepişteyan rê poşmanîye, kursê dînî yenê ferzkerdene, pê zorî tepişteyî erşawîyenê psîkologan, saetê zîyaretî kemîyenê, pêvînayîşê bi avûkatan yenê astengkerdene, tehqîqatê komkîyî yenê akerdene, rojname-kovare-kitabî nêdîyenê û tepişteyî sixletîye ra erdî de rakewenê.

Acarî waşt ke nê kerdişî wa cade bêrê qedînayene.