Qezaya Artuklu ya Mêrdînî de bîn şewe Sîteyê Sanîya Qije de Veysî (Bubo) Taş (65) xo vêşna. Taşo ke Nêweşxaneyê Perwerde û Cigêrayîşî yê Mêrdînî de dinyaya xo bedilnaye, Taxa Îstasyonî de ame definkerdene.

Eşkera bi ke Veysî Taşo ke wextê derbeya leşkerî ya 12ê Êlule de Zîndanê Amedî de raştê îşkenceyanê giranan ame û  reya dîyinî kewt zîndan û 6 mengî verî ame tehlîyekerdene, vera tecrîdî xo vêşnayo. Veysî Taşî verî ke xo veşna vîdeoyêk ant, sebebê çalakîya xo vat û  Whatsapp de pare kerd.

Taş vîdeo de nê ardî ziwan:

Senî ke Musa (Anter) vano ez hem şahîd hem zî vergumanê na dewa ya. Hendê ey nêbo zî emrê mi zî pê na dewa de ravêrt. 10 serrî yo mi xo peyde ant û ez kena ke têna payan ser bimanî. Emrê mi zî şi. Coka ez emşo bedenê xo dana adirî ver. Ez do tecrîdê Îmraliyî protesto bikerî. Nê ya wetêr armancê mi çîn o. Wa qicî û wayûbirayê mi pê bawer bê ke ez kesêko şenik nîya. Ez nê rayîr de ganê xo feda kena.  Ez semedê serekê Kurdîstanî ganê xo feda kena. Çunke emrê mi pê na dewa ravêrt. Seba ke ez bîya extîyar hinda nêeşkena çîyêk bikerî. Wa xelet nêro famkerdene. Ez çewî ra hêrsbîyaye nîya. Ez veng dana şarê kurdî. Yewbînan bitepişê. Feydeyê çîyêkê bînî ma rê çîn o. Seke mi vat ez 12ê Êlula 1980 de Zîndanê Amedî de  ameya tepiştene.

Merhaba embazê mi.

Ez şexsê xo de na çalakîye emşo kena. Na çalakîya mi semesê serekê Kurdîstanî Abdullah Ocalanî ya.22 mengî yo binê tecrîdî de yo. Ez nê tecrîdî lanet kena. Eke 22 mengî yew merdim nêeşkeno qale bikero, ganî ma kurdî wayîrê Rayberê xo vejîyê. Nêbo ma yew bi yew yenê çînkerdene. Ma mîyanê xo de vila benê. Ez cinîyan û ciwananê kurdan ra nê wazena. Ez lewe nana şima perûnê çiman a. Bimanê weşîye de. Kerwanê şehîdan mi paweno. Xelef Kavrî wextê destpêkî de hemrayê mi bi. Ferhat Kurtay mi paweno. Ez do sereberz çalakîya xo bikerî. Çend torn û qicê mi est ê, pêro zerîya mi de yê. Ez perûne ra hes kena lewe nana înan a. Wa wayûbirayê mi hol bî. Wayîrê qican û tornanê mi bivejîyê. Hetkarîya înan bikerê. Şima ra waştişê mi no yo. Kênayê mi babîyê şima merdimêko bişeref o. Babîyê şima çîyêko xirab nêerd şima ser. Qiymetê pere, mal, mulkî çîn o. Peynî de merg est o. Ma pêro do nê rayîrî ra şiro. Çîyo tewr rind oyo ke merdim pê şerefê xo semedê welatê xo biciwîyo. Veyvê mi, qicê mi, warkêna, warzayê mi, birarkêna, birarzayê mi, mi dima mebermê.Tîlîlîyan biancê. Mi şima rê rayîrê şeref û namûsî akerd. Wextê mi temam o. Ez lewe nana şima perûn a. Bimanê weşîye de. Miqatê xo bê. Ez pê wîyayîşî şina.  Ez pê eşq û îradeyê xo şina. Ez binê zextî de nîya. Wa çew xelet fam mekero. Na çalakî, çalakîya sîyasîye ya.  Semedê Rayberîya ma ya. Şewe weş. Kamî/e ser heqê mi est o, wa helal bo. Wa ê zî mi rê heqê xo helal bikerê. Ez şima perûne rê cuya şima de serkewtiş wazena.''