Mereş de bi wesîleya serrgêra 41. a  Qirkerdişê Mereşî aktîvîteyêk ameye organîzekerdene û êyê ke ameyî qetilkerdene ameyî vîrardene. Verê vîrardişî heta Cemxaneyê Erenlerî bi sloganan rayraşîyayîşêk ame kerdene .

Serekê Pêroyî yê Komeleya Kulturî ya Pîr Sûltan Abdalî Ganî Kaplanî, Hemserekê Pêroyî yê Komeleyanê Kulturî yê Elewîyan Îsmet Kurt, Serekê Pêroyî yê Waqfê  Kulturê Anadolu yê Heci Bektaş Velî Ercan Geçmez, Hemserekê Federasyonê Elewîyan yê Brîtanya Îsrafîl Erbîl, Wekîlê CHPyî Alî Oztunç, Wekîlê HDPyî Zeynel Ozen, Kemal Pekoz û Semra Guzel û bi seyan kesî tewrê aktîvîteyî bîyî.

Gunbengê akerdişê vîrardişî Serekê Heyetê Bawerîyî yê Federasyonê Alevî Bektaşî Hasan Kilavuzî kerd. Bi nameyê Komîteya Amadekarîye Hemserekê Komeleya Kulturî yê Erenlerî Muslîm Ibiliyo ke qisey kerd   Qirkerdişê Mereşî sey sûcê merdimîye name kerd û vat êyê ke nêwazenê nê hemparê nê sûcî bî ganî vera naye bivejîyê. Kemal Pekozî vat: ‘‘ Demê Koçgîrî ra nata darbê ma weş nêbîyî her tim gonî yena. Agîrî , Zîlane ra nata no dewam keno. Derbê ma yê Sîwas, Gazî û Roboskî hema dejenê. Nika zî bi xespkerdişê heqanê şarî derbê neweyî yenê akerdene. Ma wazenê ke wa hînî derbî bêrê piştene. Seba nayî zî ganî bi qirkerdişan bêro têrî.''