Hasan Duduko ke Tekîrdag de leşkerîye kerdêne hetê leşkeranê payeberzan ra ci rê îşkence ame kerdene û bedenê ci de cixare ame hewnakerdene. Duduko ke semedê îşekence ra fîrar kerd psîkolojîya ci xirab a.
Hasan Duduko mêrdinij wexto ke Tekîrdag de leşkerîye kerdêne leşkeranê payeberzan o derb kerd û bedenê ci de cixare hewna kerd.
Dudukî 1ê temmuza 2020î de dest pê leşkerîye kerd û 10ê teşrîna peyêne de çawişê pisporî R.K. o kuwa. Milê Dudukî kuwayîşî ra mor bi. Dudukî 13ê teşrîna peyêne de fîrar kerd û 8 saetan ra dima agêra fermandarîye. Têgêrayîşanê xiraban û gefan ra Dudukî 25ê teşrîna peyêne de reyna fîraz kerd û şi Mêrdîn. Dudukî gerreyê leşkeran ê payeberzan kerd.
Dudukî derheqê mesele de Ajansê Mezopotamya (MA) rê qisey kerd.
Dudukî ard ziwan ke o seba ke raporê derbe bigêro şîyo revîr la leşkerê îşkencekerî R.K. xîret kerd ke Duduk asteng bikero. Dima ke Dudukî rapor girewt fermandarê ci destûr nêda ke şoro nêweşxane. La Dudukî rayîrêk dî û şi Nêweşxaneyê Dewlete yê Çerkezkoyî û rapor girewt.
Dudukî îfade kerd ke fermandarê ci ey rê gef wend ke eke o gerre bikero fermandar cezaya tewr girane bido ci. Dudukî nê gefan ra dima fîrar kerd la wexto ke 8 saetan ra dima agêra leşkergeh reyna maruzê îşkenceyan mend. Dudukî serdozgerîye de îfade da û da zanayene ke ci rê îşkence ame kerdene.
Dudukî eşkera kerd ke leşkergeh de leşkerî xîret kenê ke xo bikişê, înan rê têgêrayîşê xirabî yenê kerdene û leşkerî fîrar kenê.
Dudukî 25ê teşrîna verêne de reyna fîrar kerd û şi Mêrdîn. Dudukî vat ke îşkence ra psîkolojîya ci bîya xirab, antîdepresanan gêno û tersî ra nêeşkeno rabikewo.
