Keyeyêko kurdo ke Başûrê Kurdîstanî ra ame Mersînî bi hedefê hêrişê nîjadperestan ê tirkan. Keyeyî ra 2 kesî birîndar bîyî. Hêrişkerî ameyî tesbîtkerdene la selahîyetdaranê tirkan xo kerd kerr.
Keyeyêko kurdo ke şaristanê Hewlêrî yê Başûrê Kurdîstanî ra ame Mersînî herêma Gozsuzce Sirtlanî ya qezaya Bozyaziyî de bi hedefê hêrişê 3 nîjadperestan ê tirkan. Hêrişkeran pê îşaretê ulkucîyan hêrişê keyeyî kerd. Netîceya hêrişî de 2 kesî birîndar bîyî û wedarîyayî nêweşxane.
Dîmenê hêrişî medyaya dîjîtale ser o ameyî vilakerdene. Dîmenan de dîyeno ke birîndaran ra yew xo ra şîyo û mîyanê gonîye de erdî ser o dergkerde yo. Vengêkî zî vera vano 'Camêrd kişîya.'
Mersin’de Kürt aileye ırkçı saldırıhttps://t.co/hghUaQ6xYo pic.twitter.com/jMfI95h9j2
— Mezopotamya Ajansı (@MAturkce) May 14, 2021
Nêzanîyeno ke hêrişkerî ameyê destbendkerdene yan nê. Selahîyetdaranê tirkan hema derheqê babete de eşkerayîyêke nêdaye.
Şahîdê serebûtî Cîhan Kutlukî vat: ''Pê kerrayan înan hêrişê mêrik û lajê 12-13 serrî kerd. Mêrik ver bi bendan kewt û xo ra şi. Înan xîret kerd ke mêrik kendalî ra bierzê. Beno ke no serebût sey 'rayîrnêdayîşî' bêro mojnayene la wina nîyo. Wexto ke înan nîşanê bozkurtan kerd û kurdan rê nêng çina mi fam kerd ke hêriş hêrişêko nîjadperest o. Nê kesan 5 deqayan kurdan rê nêng çina. Mi mêrik girewt wesayîtê xo û berz noqtaya cendirmeyan. Dima zî ma venga ambulansî da û mêrik berd nêweşxane.''
Kutlukî îfadeyê xo yê Qereqolê Cendirmeyan ê Tekelî de vat hêrişkerî wesayîtê Honda Civicî yê reşî yê bi plakaya 01 YG 428 ra peya bîyî û hêrişkeran ra Mehmet Fatîh Pflazî pê kerra da ramitoxê wesayîtê keyeyê kurdî.
Goreyê agahîyan heman hêrişkerî şahîdanê serebûtî rê zî gefî wendî. Kutlukî vat: ''Mehmet Fatîh Oflazî vat 'Kamê ke şahîdîya nê serebûtî bikerê ez do pabeyê ci vindera û înan bikişa. Ez do tîya kurdan rê teng bikera.' ''
