Wekîlê HDPyî yê Îstanbulî Erol Katirciogluyî cewab da persanê ANFyî.

Katirciogluyî pare kerd ke ganî dewlete nê prosesê 'keye de mendişî' de hewcedarîyê şarî peyda bikerdêne û vat: ''Hukmat vano pere çin o. La zere û teberê welatî de tim pere dano şerî. Herinda ney de ganî pere şoro şarî. Çimeyê welatî seba şerî xerc benê. Hîşmendîya îqtîdarî haştîye nê şerî ser o vindena.  Heyf ke îqtîdar tim şer tercîh keno. Hema cewab nêdîya persê '128 mîlyar dolarî rê se bîyo?' la eşkera yo ke no pere polîtîkaya şerî ra semed vînî bîyo.''

Katirciogluyî bale ante serebûtanê xokiştişî ser û vat: ''Merdimê ma bêwayîr ê, dewlete herinda şarî de paştî dana zengînan. Cinîyî û ciwanî tewr zaf binê tesîrê krîzê ekonomîkî yê janî de manenê. Ganî verî paştî bêra dayene nê kesan.

Doneyê TUÎKî raşt nîyê. Enflasyon tewr tay hûmara TUÎKî ra di qat zêdêr a. Ekonomîya Tirkîya girêdayîya îtxalatî ya coka muhtaca sermayeya xerîban a. Eke îqtîdar rewşêka bawere bimojno sermaye xora do bêra welatî. No zî eke welat welatê huqûqî bo beno.''